Jaffe's BLOG
不經不覺, 原來已經”捱”左i-cable寬頻6年幾7年…
本人住舊樓, 從只得netvigator電話線寬頻用… 之後有線舖到此大廈… 裝到天線寬頻, 直至今時今日香港寬頻終於舖光纖舖到黎入屋… 終於將我從icable有線寬頻(我稱斷線寬頻)拯救了出來!
我一向都唔係追求什麼極速寬頻500M, 1000M… 我只要一個穩穩定定, 上下網… 睇下youtube, 蘋果動新聞就ok…
偏偏有線icable連呢啲咁基本都做唔到… 成日都無服務… 一冇就冇一兩日… 打上cs, 等佢派人上黎… 未等到, 個network又突然好返… 都唔知攪什麼魚蝦蟹…
前日, 終於遇到香港寬頻在我樓下擺街檔… 我先醒起, 原來我個icable broadband已經偷偷地完左約, 仲衰到博我自動轉賬唔覺收我正價$359!!! (原本係$229)
一怒之下, 無論hk broadband收我幾多錢都轉… 點知… 原來hk broadband俾足1000Mb我, 都係$178一個月… 抵過icable個假狗130Mb經常斷線plan
話晒都係光纖入屋… 點都好過icable天線全橦大廈share… 唔斷都慢到暈… 鬼咩… 呢個年代, 個個都識BT… 成橦大廈share… 唔慢有鬼!
今日師傅夜晚九點黎拉線…
以為有電線喉會好快攪掂, 點知… 就偏偏啲線在喉內kick實晒… 點都拉唔到…
攪左個幾兩個鐘, 最後… 要犧牲左本來條cable tv天線, 先可以拉到條fibre入屋…
即係話… 拉左條新線入屋, 我房就睇唔到電視了!
暫時, 未諗到方法前, 房內就冇電視睇了…
師傅走後, 立即speedtest下條線有幾快… 原來都有超過800Mb… 已經好滿意了! 希望斷線唔會出現…
作為一個現代人, 網上戶口極多… 有時啲N年都唔會用到既戶口… 一旦要用, 當時既密碼十居其九都會唔記得左…
正如今朝忽然想登入保險帳戶改一改自動轉帳方式… 就撞極都撞唔岩N年前set好既網上密碼!
雖說如何設定一個安全既網上密碼, 每間公司都有唔同既規則…
由限定字串長度, 中英夾雜, 大小寫夾雜, 甚至有啲規定要有特別字符…
往往令到你用開既所謂”高安全性”通用密碼不能使用, 就變成又要多記一個密碼…
現代人既腦袋, 已經被”搜尋引撃”, “記事本”, “通訊錄”縱壞… 現在, 我連自己公司枱頭電話已記不住… 莫講話一個N年唔會用, 加”高保安”度既網上密碼…
網上帳戶, 另一個精綷就係”忘記密碼”功能…
要做好呢個功能, 都非容易…
一般黎講, 最簡單既方法就係慼你網上帳戶號碼/ID, 直接電郵返個密碼/新密碼去你登記既email, 安全少少既方法… 就係電郵一個”重設reset password”既link… 等你去重新設定一個新密碼… 或者用SMS傳送新密碼去你登記既手提電話上..,
以上幾種… 係坊間最常用既做法…
今日, 我登入唔到英國保誠保險既網站… 我用佢地提供既密記密碼功能… 當我輸入晒所有保單號碼, 身份証號碼, 出生日期後…
佢就話會郵寄新密碼去我通訊地址…
我等下一分鐘, 等下兩分鐘… 幾個常用既電郵都檢查過, 都係冇收到新密碼…
我再返去網頁睇下…
完全呆左… 睇清楚後, 原來佢係寫”新密碼將會以郵寄方式寄抵閣下之通訊地址”
嘩… #!%$#$# 在呢個資訊急速化既年代, 竟然會有公司在處理我認為”緊急”既工作, 用郵寄形式黎處理… 可算是返璞歸真… 咁樣被佢攪一攪, 我又唔知要等幾多日…
邊個咁醒, 諗到啲咁既方法…
有時, 我真係好認為… “科技係生既… 人係死既…” 呢個先係大道理…
週末既夜晚, 有線寬頻再一次失靈, 屋企又上唔到網!
其實近期已經斷斷續續出現左5, 6次… 一斷就半日一日… 對於我呢啲唔上網唔安樂, 唔睇TVB睇東方衛視(iptv)既香港人… 極度唔方便!
撞岩今晚落雨, 心情有點失控… 即刻打去1832832個有寬頻線投訴熱線…
有線服務員好例裨咁問我一大輪個人資料, 又check我”屋苑”有冇維修工程
最後又話幫我check modem訊號, 叫我熄機… 熄左機成3分鐘又叫我開返
好明顯係用絕招restart modem, 我呢啲IT人, 又點會唔一早用過晒呢啲低招丫?!
最後, 又咪係唔得… 仲side多我成十幾分鐘! 服務員終於話派個師傅上黎檢查…
但我問佢最快幾時… 服務員話最快係下星期二喎… 我聽完火都黎… 你唔即刻派都聽朝派啦!
我即刻問佢: “吓? 咁你叫我呢幾日點呀?” (質問語氣)
我平日應該唔會咁對啲服務員, 因為我明其實佢地都係打份工無辜的小朋友… 但呢一刻, 我真係忍到唔爆粗但忍唔到漏左少少石油氣出黎…
服務員, 應該一更都俾人鬧唔少次, 佢沉默左兩秒之後, 冷靜咁講左句: “唔好意思, 你呢幾日都用唔到寬頻了”
作為客, 唔想潑婦罵街, 為份尊嚴, 你唯一可以做既, 就只有唔幫襯囉…
可惜, 我記得我份兩年約未到期… 我只有好勞氣咁問一句: “我份約幾時到期呀?!!!” (被綁既可憐客, 最大口氣就大概能這樣了)
服務員查左一下: “二月十四” 聽到呢個日期, 我真係唔知好嬲定好笑… 二月十四情人節喎… 好多回憶返晒黎…
我仲記得兩年前既二月十四, 被有線昆我續左約… 我仲打左篇blog添… 距離下年二月十四大約仲有兩個月, 無辦法… 唯有等到下年情人節先同有線分手…
打算到時試下用香港寬頻, 希望唔好令我失望…
最後, 我忍唔住要同有線寬頻你拜個早年…
到底要幾失望, 一個用家先會抽時間打篇blog黎投訴一件產品呢?
話說上年年尾, 購入輝煌Magic-Pro既一款外置式充電池, 打算去長途旅行用; 被Magic-Pro呢隻ProMini 8000 Spec吸引, 加上廠商名都叫聽過… 雖比其他牌子同類款式稍貴, 亦都選擇左佢!
點知, 惡夢就咁開始…
在旅行前用左兩個月, 都好地地既, 點知… 抵達旅行目的地既第一個晚上, 部電話電池所餘無幾, 諗住充電… 就發現個外置電突然壞左… 竟然無電出, 但面版上既LCD燈均顯示正常, 只係電話完全無反應, 彷如無插電線一樣!
人在外地, 人生路不熟, 要靠晒部電話上既GPS地圖, 上網搵資料喎… 而家流落異鄉加上就快無電先臨時失效, 內心異常之徬徨…
但當時我仲天真到覺得只係條usb線壞, 對輝煌粒電仲充滿信心… 急忙搵到間當地便利店, 以超貴既價錢買左個AC充電套裝(只係想要條USB而已), 跟住一試… #@!#EQ#$%#@… 都係唔得… 點知用個AC充電插牆完全可以充到電… 用番粒外置電就完全唔得… 証明左個外置電真係死左!
最後, 唯有借用人地牆座充飽電先可以繼續行程! 及後仲要在當地買過另一個外置電, 先可以令旅程順利完成… (仲要孭住ProMini條屍去畢全程Orz)
返到香港, 網上搜尋一下, 先知原來有其他師兄都遇到同一問題, 就係粒電設計得唔好, 內在組件非常容易鬆脫, 引致假充電情況, 即係面版正常, 但實際上係冇充電!
又花時間去代理交涉… 代理應該都好有經驗, 都唔駛點問就換左一隻全新既俾我…
以為好好地可以長用, 點知… 都未夠半年… 又再出現問題, 今次唔係充唔到手機… 係粒外置電自己唔能夠充電, 意思就係… 裡面既電用完, 我無辦法幫佢充電, 即係… 變左一粒用完即棄既電池!!!
搵返張發票, 原來剛好過左一年既保養期… 即係話, 無得再換了…
身價成$500既一粒外置電, 壽命竟然仲短過淘寶啲雜嘜大容量, 真係可悲…
我以後都唔會再考慮呢隻牌子啦, 拜拜! 宣洩完畢!
自從奧海城百老匯無聲無息結業後… 都一段長時間無入戲院睇戲… 更加無踏足過奧海城!
缺乏一個令自己早起身既理由… 令到星期日既清早, 都留在床上渡過… 感覺好浪費…
從新聞得知, 原來奧海城百老匯舊址將會變為既嘉禾戲院… 十二月左右就會落成… 到時候, 又可以積極地早起了!
太耐冇睇戲, 有少少癮起… 趁星期日, 九點就出門口… 準備睇早場…
今次既地點, 係旺角百老匯…
雖然旺角百老匯, 在地理位置比奧海城近… 但我一啲都唔鍾意… 因為在旺角… MK集中地… 所以睇戲隔離左右遇到MK既機會非常之大…
至於點解憎MK, 相信唔駛講… 總之睇戲時, 有人在你旁邊傾計, 傾電話, 講爛gag, 開住大mon智能手機不斷fb, whatsapp, wechat都夠你煩… 係咪?
不過無左個主場, 戲癮又起, 無辦法之下唯有近近地…
今次早場既影院… 係我最憎既5號院…
點解…? 因為5號院在10/F… 搭完一大輪自動電梯仲要徒步上多兩層… 先到間豆腐潤咁細既戲院仔…
(旺角百老匯10/F影院)
今次仲遇上前排一個電爆炸裝既女士… 攪到我成場戲都要登直個身睇, 先岩岩睇到字幕… 我相信, 坐我後面既觀眾更加慘… 唔難估計成場戲佢都孖叉足我十八代… 但無辦法, 我都係迫不得已…
睇左套超舊既”引力邊緣3D”… 雖然戲院細細… 但竟然3D效果都OK… 可能我要求唔高掛, 縱使個個都大讚IMAX 3D版好睇… 但… $60 vs $150… 我都係選擇$60 3D早場算了…
看畢… 最痛苦莫過於10層轉旋轉樓梯落番地面…
行完十層, 天旋地轉… 真係替啲阿公阿婆擔心… 雖然有老人$10票, 但要老人家咁樣行十層樓… 真係唔好講笑啦… (進場搭自動電梯時, 在我後面既兩位老人家, 去到4/F已經開始覺得勢色唔對, 擔心走既時候點算)
旺角百老匯, 再一次令我不太愉快… 真心希望年尾奧海城嘉禾開業, 會變成我新既主場…
散場後, 行左去旺角新世紀… 原來, 間嘉禾已經無左… 我真係太耐無去新世紀了… 成個商場唔同晒… 連間隔都改晒…
以前既無敵大天井… 全部填平晒, 變晒做商舖… 鬼咩… 咁填法, 真係每層都多成萬呎… 每層都可以多幾間豐澤百老匯同屈臣氏俾啲大陸人消費囉…
講返正題…
就係… 見到有廣告話… 將會有新型戲院進駐, 我相信係以前既嘉禾戲院會變成新型戲院… 不過就唔知仲係唔係嘉禾了… 亦唔知幾時會開得成… 相信都會趕及在聖誕新年旺季前落成既…
(旺角新世紀, 新戲院 @ Grand Century Place)
拭目以待…
今日聽歌… 偶然聽到楊千嬅演唱會中, 翻唱甄妮既”最後的玫瑰”…
唱歌前一段說話中提到小王子既故事… 令我開始寫呢篇blog…
無錯, 呢篇blog唔係講楊千嬅… 亦唔係討論歌詞… 而係講小王子呢個故事…
我細個時無睇過小王子故事… 大個都唔算有…
小王子故事既內容係近年一個人講俾我聽既…
到左我呢個年紀先認識小王子, 我唔會講係太遲… 因為我覺得小王子故事唔係童話故事… 反而, 我覺得有返咁上下人生經歷… 聽/睇呢個故事反而更有體會…
小王子故事, 膾炙人口的只是”小王子、玫瑰、狐狸”的那段吧…
原因? 留待你們去發掘…
網上不少做得得很美的插畫… 與大家分享一下:
寫下寫下… 有少少懷念故事內容…
唔會再有人同我講呢個故事… 但, 我相信坊間仍有不少相關書藉吧…
有時間去書局逛逛…
今日, 中秋節長假期第二日… 晨咁早落街搭巴士去荔枝角工業區, 去sandisk維修部換返張壞sd card…
我樓下巴士站, 有兩架車係我從小到大都經常搭既… 一架係6號, 一架係6c…
以前經常會搭6號, 因為去長沙灣圖書館, 或在美孚既同學仔屋企比較方便…
而家就經常搭6c, 因為屋企人搬左去荔枝角, 搭6c會最方便…
細個時已經留意到一個現象… 就係想搭6號既時候, 偏偏一連幾架都會係6c… 等下一架, 等下又一架… 偏偏等極都等唔到…
近年都係… 每逢想搭6c, 又係會一連幾架都係6號… 等極都等唔到6c…
今朝又遇到同一個情況… 明明等6號… 但等左幾架都係6c… 今朝太陽好猛, 呆企在路邊等車, 真係精神差啲都會中暑… 等下等下, 又唔服輸等足半個鐘先等到一班6號… 講真… 行路一早到左!
忍唔住要將呢個收埋左好多年既心結寫blog了斷…
係天生無運行? 定係個天都唔鍾意我?…
其實我一早都參透到小小答案… 就係反過來想… 當你一到達巴士站, 你想要既巴士剛到… 或者等唔夠幾分鐘就上到車… 你有冇將呢件’幸運’既事放在心呢?
當然無… 對於呢啲’小恩小惠’, 人類絕少感恩牢記在心… 粗俗啲講, 幸運永遠當係’老馮’…
但有啲雞毛蒜皮既’小事’, 就會牢記在心… 例如等巴士等極等唔到呢類’小事’… 等下等下, 一件’小事’就會幻化成一件好比’好醜命生成’既’人生大事’… 無事無刻提示自己點解咁唔好彩… 點解人地’遲黎先上車’云云充滿負能量既意念…
寫呢篇blog既目的, 都只係想同大家分享下(同提下自己)… 千其唔好遇到乜事都從壞方面無限放大… 小小事都失落一餐…
P.S. 以上所謂理論, 同坊間的”巴士理論”, “公車理論”無任何關係… 只係小弟等唔到巴士啟發既小小結論
