唔知幾時開始, 更改淘寶帳號內容既時候, 系統會要求我先入電話驗証碼, 最煩唔係要我輸入驗証碼, 最煩係一定要用大陸既電話號碼!!!
所以, 要專登去鴨記買張電話咭, 就係為左食呢個驗証碼!
一去之下, 發覺原來買電話咭真係一個大學問, 一個路邊攤檔竟然有幾百款唔同既電話咭賣! 唔係誇張, 真係有幾百款!
摸不著頭腦, 又唔知應該買邊款既”摸索期”, 在檔口頭岳岳, 一臉茫然既時候, 不斷有客係我身邊買咭, 佢地可以好準確咁講出咭名同面額, 過程十秒都唔駛!
攤檔客流量好高, 但只有我一個企係度成分鐘咁耐!
最後, 檔主都忍唔住問我到底要買乜? 咁我就同佢講我要買張有大陸電話號碼既電話咭, 同埋要有固定號碼(因為我知有啲大陸電話號碼係開通時先gen出黎的! V ^^ V)
檔主隨手就拎左張HK$80蚊既電話咭俾我(呢款叫中國聯通一卡雙號, 又名如意香港通), 我唔知佢有冇聽真我講既要求, 或者我既要求其實大部份電話咭都做得到…
我”啊!”一聲咁就買左, 雖然我唔知呢張咭乜頭乜路, 但既然佢話得, 咪買黎試下…
當然, 我絕對唔會好似啲師奶去買電器咁反問店員: “呢個會唔會好快壞既呢?”
呢種廢問題, 返黎既答案只有兩大類…
1) 唔會, 放心用 (唔通話好易壞咩! 邊個會話自己賣啲貨易壞呢?)
2) 呢款當然好快壞啦, 拿! 我介紹xxx俾你啦 (之後sell你買另一款貴十倍的同類產品)
—
最後, 大致上張咭都冇問題… 有效期180日(比較短, 即係半年要增值一次, 否則張咭會失效), 可以收到淘寶send黎既驗證sms, 亦可以打出打入電話, 但係竟然send唔出sms!!!
本說明書明明寫可以收發短訊, 但真係唔明點解試極都唔得… 身為一個IT人, 滿有信心咁走去電話個setting睇下佢個sms gateway寫左啲乜?
一睇之下, 吓?! 原來個server係大陸號碼, 即係+86行頭既(+8613010888500)… 咁即係佢個sms係用大陸server? 直覺就係, 會唔會其實要set返個香港號碼先可以發到短訊呢?
原來呢個世界真係乜都可以問google, 一問之下… 解決方法係要改下個sms gateway號碼, 不過就唔係改成香港號碼, 係改另一個大陸號碼+8613010201500, 改完之後真係send到同收到喎!
吓?… 咁都得? 一般用家點知呢可?!
—
後話:
原來買呢啲電話咭, 個霖把係有得揀的, 每個包裝都寫明晒香港電話同大陸電話號碼, 幾百包放晒出黎任你揀, 可以揀到滿意先買!
而老細隨手俾我果一張, 果對霖把字頭都ok好的
131499xxxxx, 688xxxxx 尾5個數字兩張咭都一樣 (幾好喎)