Jaffe的分享空間 Rotating Header Image

May, 2008:

遇見神

有冇諗過, 神係點既樣?
 
神… 我冇見過 (或者… 我根本唔知佢係神…)
 
但神既使者我就見唔少! 間中都會係街上遇見… 比較傳統既有和尚, 師姑及喇嘛, 佢地仲保持住宗教傳統, 剃頭及穿著道袍…
 
但係時代進步, 我不下數十次係逛電腦商場時碰到神既使者選購最新型號既notebook, pc, pda甚至iphone!
 
論產品update程度, 配合佢地一身既打扮, 可以用"喪潮"黎形容!
 
有次見某師姑在銅鑼灣地鐵出閘, 剛好係我前面… 隨手拿出一個hello kitty既八達通套do咭! 嘩! 我再一次對神既使者另眼相看… 原來佢地都會有凡人既喜好~
 
 
假如, 有日你遇見神, 同佢認識後; 發現佢原來做緊同你一樣平凡既事, 或同你一樣滿口潮語… 你會有咩感覺呢?
 
當神, 唔再係你諗咁神…
 
你會唔會覺得, 從來冇遇見神更好呢?

慳得一蚊得一蚊

本來是一個頗為溫馨的故事: 說一位小朋友, 爭取與繁忙父親相聚的故事…
 
近星期, 留意到分別有一個無線劇集, 及超市廣告把這橋段"借用"了… 但效果絕對沒有原作的溫馨細膩, 反而把故事變得不倫不類…
 
香港的創作人啊, 可否別再抄行貨, 多點創意吧… 抄也別抄得馬馬虎虎…

有野留返拜山講

香港人真係好鍾意講電話…
 
話說昨晚放工, 搭巴士返屋企, 身處上層頭排中間位置… 未坐低, 已經聽到座位旁既裝修判頭密密同電話中既伙計傾香港仔中心那住宅工程! 聲浪之大, 如果有其他位置選擇, 我一定會選擇遠離充滿嘈音及"體香"既呢個位置!
 
未幾, 後方坐位既另一位中港客貨運商電話響起, 聽到佢正同另一位生意上朋友密密傾一單生意; 酬金五千, 給租車及司機的費用三千, 餘下二千, 即每人可賺一千… 但那男人剛好手緊, 三千元的租車及司機費需要朋友先奠支, 又話今次真係需要朋友幫呢個忙, 有機會再報答云云…
 
左右耳正在接收兩單生意詳情之際, 另一邊的婦人開始佢同菲律賓工人之高聲對話(港式英語), 說妹妹家裡的賓賓要回老家, 急忙需要一個替工兩三個月時間, 高聲的OK, Umm, Arrr, Well, Yes, No… 斷續低聲的其他英文單字… 令我覺得佢為港式英語起革命, 令一句句刺耳既的句子, 驟然聽起來頗有韻律…
 
短短的十五分鐘巴士車程, 電話聲浪不絕於耳, 往玻璃窗的倒影後望, 發現原來香港人並不甘於浪費坐車的時間, 總要找些工作來充填時間, 傾電話係一個非常慣常既方法…
 
我呢個只想靜靜地坐車, 乜都唔做既人; 被強迫分享佢地生命中既繁忙節奏, 承受佢地家庭既煩惱…
 
*** 後記: 講電話你有你自由, 公眾地方, 真係請注意聲浪, 太多人講電話不自覺地將自己聲線較到最大呀!!!   ***

發錢寒

近日打算為家中添置一部LCD電視, 之前已經留意到有個HSBC信用咭迎新優惠:
 
出兩張HSBC信用咭, 各咭簽賬$2800大元, 再另加$9999就可以換到Samsung 40寸全高清內置解碼LCD電視一部 ! 以呢個config兼名牌電視黎講, 真係無敵~ 可惜離我家裝修完工日尚有一段距離, 又唔想作出無謂簽賬, 所以思想了個多月仍未行動…
 
發覺網上近日已經流傳大量"二手全新貨", 價錢由$11500至$13500不等… 原來香港有一大班努力不懈既人, 為左賺取$1500至$3500呢個利潤, 一早已經開晒新咭, 並簽好賬… 手執兩大封換領信出售, 甚至換埋大大部電視原盒放左係屋企! 在各大二手website登廣告, 靜待有人幫襯…
 
大概估計有好多我呢類怕麻煩但又想換呢部電視吸引既人上釣罷?
 
勤力的香港小蜜蜂不斷工作, 不斷找方法"搵快錢", 為著自己目標的富足生活奔波…  

 
 
而我這條小懶蟲呢? 掛在脖子上的餅乾吃光之後… 好像會懶洋洋, 眼光光地餓死~ 阿門!

全國哀悼

回到家中, 收看今天的電視新聞…
 
一幕幕同胞們的團結行為, 深深感動; 中國人, 底裡還是一個有情義的民族!
 
電視中的LOGO, 各網站標題, 都暗暗地為災難受害者送上最後的祝福…
 

5月19日 – 陰

2:28pm – 2:31pm
 
在公司座位上閉起雙眼, 默默渡過了3分鐘, 嚮應了政府呼籲的默哀行動…
 
鍵盤, 人聲, 電話聲在這短短的3分鐘內不絕於耳, 大概眾數都對默哀這行為沒有認同…
 
甚至在默哀時間之前, 朋友談及他公司的集體默哀為極無聊之舉,
 
但我覺得這是對遇難者的一點禮貌而已…

苦苦找藉口?

地震來到第六天, 餘震不絕, 死亡數字更不絕, 內地同胞需要援手;
 
我們遠在幸福的香港, 沒有地震災害, 在富足的環境下生活… 作為中國同胞, 甚能再猶豫?
 
不斷有團體及朋友發起捐款, 渠道眾多; 但聽到更多的理由不去捐助… 人情的冷漠, 聽見心痛…
 
捐款多少無拘, 從來都是心意; 把娛樂消費捐出去, 不比自我享受來得更有意義嗎…
 
何必還在苦苦找藉口?
 

如果有神

為何未阻止不幸?
 

買樓如買棍

沙田御龍山, 價錢絕對係我心目中既豪宅級… 雖然坐落於火炭, 但售價絕對直迫跑馬地禮頓山!
 
有網友在示範單位拍了幾段短片, 給大家見証促銷實況:
 
雖然睇唔清楚"叫賣"嗰幾位所謂美女既容貌, 但單憑聲線, 絕對可媲美深水埗北河街叫賣四十蚊神奇地拖棍嗰位嬸嬸! 叫嚷聲不絕, 此起彼落, 從沒俾聽眾喘息機會, 製造成一個不可多得, 機會難逢既氣氛!
 
從來未聽過咁新穎既豪宅叫賣方法, 千幾萬既樓, 係一個普通打工仔一世人都無辦法買到既物業, 但叫賣如同叫你買一個四十蚊既地拖棍般輕鬆… 實在令我大開眼界, 係邊個總裁諗出黎架呢?
 
 
1 of 3
 
 
 
2 of 3
 
 
 
3 of 3
 
 

滿屋神佛

首先, 聲明這篇文章絕對不想冒犯任何神靈佛祖、宗教祖先有關的事情…
 
但今天晚飯後, 得知原來舊居的神位: 大廳的三層高神樓, 上層的"佛祖、觀音", 中層的"凌氏祖先", 下層的"地主、財神", 還有露台的"天官", 廚房的"灶君", 大門口的"土地神", 全部在裝修後要保留; 父親大人的堅決, 我實在只可說無可奈何…
 
在個人來說, 並沒有宗教信仰, 除了在清明時節給嫲嫲上香, 平日並沒有拜神的習慣… 舊居裝修, 父親堅持保留那三層的神樓, 已經令我晴天霹靂… 在一個全無信仰的"年青人"家中, 竟有供奉一座三層高的神樓, 晚上還會發出耀眼的紅光… 實在匪疑所思… 我相信如在家招持朋友, 特別是女性朋友, 看見那麼多神主牌, 會大吃一驚, 甚至可能懷疑晚上會否在家玩神打…
 
用了差不多三個月時間去接受現實, 覺得保留神樓也無可厚非, 作為凌家長子及單傳子孫, 保留一個祖先神台也尚算合理, 但對於其他的神位也要一併保留, 實在是摸不住頭腦…
 
 
在這幾個月, 不斷翻看一些跟家居神位的風水書, 才發覺… 神位放了數十年, 根本沒有按風水規矩擺放, 供奉; 犯了多重嚴重錯誤…
 
看書的目的, 並非一心找理據把神佛移離; 反正要放, 只想放得適宜… 可惜, 一看之下, 原來數十年他們並沒有被好好安放, 如相信神佛, 為什麼只是"擁有"他們而不誠心去供奉他們?
 
 
人生一樣, 很多事情, 你從沒想過把它做好, 為甚麼要去做呢?