Jaffe的分享空間 Rotating Header Image

September, 2009:

人在邊緣

做了五年多的邊緣人… 轉新工後, 邊緣人的身份幾乎失守…
 
講既係辦工的位置… 舊公司的坐位, 在大廳的最後排… 背後靠牆, 唔會無啦啦有對眼望住你做緊乜… 老細走黎搵你, 都要走過重重坐位… 甚至佢一起身, 你己經可以開始扮做野, 私隱度, 安全度極高, 成就了一個貌似開放, 但高度隱蔽既理想工作空間…
 
集天時地利人和… 更加進可攻, 退可守… 實在係各員工必爭既福地…
 
不過… 轉左新工後, 變左new potato, 可供選擇既領土, 當然冇之前咁優越…
 
好彩既係, 早前決定九月中就開始新工作, 其他新同事尚未加入, 座位可以隨便選擇… 否則連僅餘既次等好位都會冇埋…  
 
大房背靠窗門既位置… 早早已經俾人霸晒… (真係剛好滿座)
 
可選擇既, 只有沒有背窗的座位…
 
無辦法, 最好既背窗位無晒… 只有選擇"次一等"既邊位… 就係角落的邊位… 雖然背後有人… 但總算右手邊靠牆…
 
配合左手邊的L台設計… 除左後面的一位同事睇到我的desktop lcd之外… 我左手邊的netbook位基本上可算係高度私隱, 冇人會知我左手邊netbook做緊乜… 總算為自己保留少少私人空間…
 
 
最少, 我可以好安心咁慢慢打blog…
 
人, 無論係咩地方, 咩時候… 總會需要私人空間既, 係嗎?

手停口停

開始了新工作, 月底… T Contract既員工, 都要填一份Timesheet, 作用就好似向老細收賬一樣, 有開工既日子就伸手拿錢…
 
Timesheet, 第一次唔識填, 就只有參考同事既Sample…
 
記得九月中, 有兩日辦工時間受颱風影響, 一日18:00pm掛八號(理應16:00就提早放工), 一日就10:00am先除八號(理應只返下午)…
 
參考同事填既返工時間, 發覺應早放既時間冇早放到, 應遲返既時間亦都冇遲到…
 
好奇一問之下… 原來T Contract既同事都不甘被扣薪, 所以都寧願返足每日8小時… 免得荷包縮水… 
 
甚至, T Contract連病假都係冇人工出的… 大部份人都唔甘願被扣薪, 發住燒都堅持爬返公司…
 
突然間, 心裡一陣子酸… 點解? 點解我地呢類合約員工要攪到好似地盤散工咁, 手停口停…
 
病到五顏六色都要爬返公司報到, 打大風都要冒雨返工…
 
正宗要好天搵埋落雨柴… 非必要都唔可以放假…

Puppy Love 09

日前食晚飯, 坐在對面既兩個年輕人, 大約十三四歲著住校服既中學生… 其中一個談及女友不誠實…
 
A: 佢到而家都唔肯對我誠實…
B: 咩事?
A: 佢仲係對我講大話, 佢呃我叫佢張美玲…
B: 下? 咁你有冇拆穿佢?
A: 冇! 我今晚會俾多次機會佢講真話…
A: 我知佢真名其實叫羅寶琼, 我都識佢學校既人, 佢點會呃到我丫!
B: 你地一齊左幾耐?
A: 都四個月了…
 
此時, 坐在對面既我真係聽到R晒頭… 而家d後生仔, 拍拖連人地真名都唔知… 咁奇…
 
B: 可能佢覺得真名唔係咁重要呢
A: 對我唔認真, 咁一齊落去有乜意思呢!
B: 咁你今晚不如拆穿佢啦!
A: 好! 我會搵個機會當面拆穿佢! 等佢瘀下…
 
又過左好耐, 我一直聽住… 佢地話題都係圍繞住A女友既"不忠誠", 傾左好耐…
 
B: 你見過佢未?
A: 見過, 有次係旺角見到佢同班friend一齊, 我在對面望住佢, 不過佢應該唔知係我黎…
 
下!? 車… 拍左"拖"四個月… 原來未見過面… #!EWDW%$#%
 
此時, A拿起手機, 逐一向B顯示女友的SMS留言…
 
A: 佢好似好多野都呃緊我咁… 佢咁對我, 我好唔開心…
B: … (已經唔知講乜好)
 
A: 其實我有好多心事… 想搵朋友出黎傾下, 飲下野… 飲啤酒… (此時, 聲音懶係歷盡滄桑, 同好強調飲啤酒)
A: 不過好多心事唔可以亂咁同人講, 怕人傳出去…
B: 遠在天邊, 近在眼前, 你都可以同我講, 不過我唔飲酒…
 
又再聽佢地胡言亂語左十數分鐘, 直至食完碗麵鬆人…
 
我真係老了… 完全唔明而家d後生仔既生活…

別讓孩子看童話

從小到大, 被童話故事涂毒… 以為所有故事不論如何經歷慘況… 最終一定能夠大團圓結局, 所有惡人也得報應… 努力付出過的, 必能得到收成…
 
日前, 看到一套日本電影"小豬的教室", 本來只以為是一套溫情的日本小朋友電影… 看畢, 始發覺這是一套好電影, 好不在一隻可愛的肥豬, 亦好不在一班可愛的小學生… 我欣賞的, 是這電影帶出殘酷的現實…
 
故事描述班主任把小豬帶到學校, 讓小豬與小學生一起上學, 一起成長… 日子過去, 小豬與同學們建立了深厚的感情… 終於, 同學們要畢業了, 將要離開學校… 再沒有人會照顧小豬, 班主任打算把小豬送到屠宰場去, 同學們經過一番努力, 用盡一切方法把小豬的性命保留…
 
如果這是一個童話故事, 導演一定把過程編排得歷盡鞎辛, 在小豬被送到屠場之前一刹, 把它的生命救回… 大團圓結局…
 
我欣賞的是, 結局並不令人愉快… 小豬, 儘管同學們跟它難捨難離, 用各種方法拯救, 最終… 班主任一個人的堅持, 被送上屠宰之路…
 
 
別再讓小孩看童話… 現實並沒有那樣的幸福存在… 別把所有事情看得太樂觀…
 
別以為努力過… 定必有回報…
 
別以為得到愛… 故事會完美…
 
現實是殘酷的… 人是自私的… 到了決定性的時候, 還不只是先想著自己?
 
來到這世界, 你是一隻豬… 別自以為得到人類的愛, 別自以為跟人類建立了感情, 別以為得到人類同樣的對待… 到最終, 人類看你還只是一隻豬, 別期望奇蹟發生…
 
他們愛你, 同時亦送你上屠場, 他們會為你哭… 呸, 這又代表什麼?