快樂, 其實係點黎既呢?
如果中六合彩頭獎係天賜既快樂…
個天俾你中頭獎, 但獎金破新低紀錄只得五十萬; 你會唔會第一時間覺得快樂呢? 定係第一時間覺得乜得咁少獎金而心有不甘呢?
如果, 將所有快樂都先用尺去量度, 你其實都未得到快樂…
February, 2009:
五毫子
五毫子, 究竟價值有幾高呢?
曾經, 見過人係街上跌五毫子, 硬幣叮叮噹噹在地上奔馳… 佢只係望左一眼, 連半點想回頭執既小動作都冇… 或者, 要眾目睽睽之下去追一個五毫子… No Way啦~
發覺 "臉子比五毫子更緊要…"
我就有一個五毫子既故事, 因為五毫子, 我十幾年來都不斷會回憶起這件小事…
城大年代既Final Year Exam, 每朝我都會大清早返學校溫習, 而返學校溫習既路上有一大排檔, 賣白粥油炸鬼… 每朝, 我都會買同一款既早餐 – 皮蛋瘦肉粥加腸粉, 價值$20.5…
考試期間每朝都食同一款, Dry到老闆娘都已經認得我… 最後一日既考試, 我如常去買早餐, 俾錢既時候, 剛冇零頭既五毫子…
老闆娘話: "由得佢啦"
我係都要俾錢佢找… 咁老闆娘就話: "咁你聽日來既時候先一齊俾返啦…"
雖然我明知果日之後, 以後都唔會再去… 但係, 因為只係五毫子, 我就冇出聲… 隨便"嗯"一聲, 件事就完結左… (我以為…)
之後, 我真係一次都冇再去過…
但係, 之後既十幾年… 每當我經過粥檔附近… 都不其然會諗返起呢件往事…
原來, 得到人既恩惠, 雖然只值五毫子, 都可以記一世…
眼淚
今朝, 坐地鐵返工既時候… 人流唔多, 企在車廂中間柱旁位置… 面對著的, 是倚在門邊的一位少女…
少女個子不高, 穿著灰色OL上班服, 戴著白色的headphone, 長長的headphone線從耳邊一直伸延到襯衣袋中… 留意著她, 可能是因為第一個眼光… 就看到她眼眶紅紅的… 沒有閉上眼睛, 一直向前凝視著… 心事重重…
突然, 一串淚水從她眼中湧出… 好像不懂停止的; 她沒有躲避旁人的目光, 就任由眼淚隨隨在她臉上漫游著, 似沒意思拿出紙巾來, 過多的淚水無法找到安置的地方, 就用手指輕輕在臉上抹去…
看著陌生的她, 感覺很奇妙… 范曉萓的"眼淚"在腦中緩緩播放著… 陪伴著"我們"… 一起不知又走過了多少個站…
委屈嘗歡樂
日前同朋友食飯, 到某出名大排檔… 人流擠得水洩不通…
聽朋友說, 繁忙時間試過三催四請, 還有碟餸遲遲未到… 伙記不耐煩的說: "你都係唔好等了… 走罷啦…"
聽罷… 原來顧客唔係大晒既, 理直亦非永遠氣壯… 品牌出左名又搶手… 冇左你一個小客人… 仲有千千萬萬既客人排大隊, 你唔滿意, 唔該你快d走… 唔好阻撚住晒添…
—
尋日, 又去左間出晒名既雲南米線食晚飯… 又係排晒大隊… 苦等之後終於入到去…
7個人迫埋4人小圓枱, 迫到咁, 要苦笑住享受… 同桌7人手臂貼手臂, 渣筷子匙羹都要夾實兩邊膊頭… 雖然算嘗到美食, 但環境絕對比踎在樓梯捱飯盒差…
—
似乎, 香港人已經忘記咩叫快樂… 快樂現在既定義可能係… 得到大眾認同既快樂, 你先係快樂…
假如食碗10蚊無名魚蛋粉係委屈, 食30蚊何銀記麥柒雲吞先係真正快樂… 我呢世人仲未真正快樂過… 只懂委屈自己…
214‧鬼節
無情人既情人節… 可以點去應節呢?
各位大概也可以當農曆七月十四來慶祝一返… 反正… 我相信習俗都相差無幾…
鬼節當日鬼門關大開… 如果當日出街, 極可能會遇見好多痴纏鬼, 一雙一對扭埋係街度un下鍚下… 所以唔想撞鬼, 可選擇留在家中收看喜愛既av節目… (最好選擇國產古裝的, 會比較應節)
切忌貪玩在家中燒衣應節, 因為親朋戚友都會誤會你睇唔開的… 要燒, 可選擇約三五無情既知己(最好係異性)去戶外燒炭… 或者乾柴烈火之下, 會有意外收獲…
如必要外出, 街上遇上污糟野時(例如遇上當眾摷野), 記得講"借過", 及不要太正視…
見到熟人更唔好相認, 因為佢身邊出現既可能同你見開嗰個唔同左樣…
假如你發覺伴侶在214忽然人間蒸發, 非常相信你在之前已經被鬼暗眼… 請放鬆, 鬼節係佢既假期, 佢放假一天而已…
—
最後, 祝各有情人情人節快樂… 各無情人… 情人節也更要快快樂樂…
仇人節
又咁快過左農曆新年個幾星期… 每年呢個時候, 都覺得總會有人歡喜有人愁…
親戚唔多, 從小只會主動向父母拜年收取利是… 而父母的朋友到訪, 通常都被迫出廳接利是… 被迫說出幾句不從心的恭喜說話… 草草寒喧兩句就喱返入房…
出左黎做野之後, 仲會收到同事既利是… 主動問人拎利是呢個行為, 唔知點解… 自己個心總過唔去, 因為係人都知, 利是同錢咪即係同一件事…? 老馮攤大手板問人攞錢, 其實我做咁耐人, 真係仲唔習慣去逗利是…
同事拉大隊去逗利是, 更加係超級難睇, 兼難為了有資格派利是既同事, 因為… 一條龍十幾人, 可能你唔係個個識, 但只要被其中一個"龍友"認出你個衰樣… 咁就大鑊, 因為會有成隊人恭喜你發財… 咁就會無端端派左十幾封利是俾唔識既人…
當然啦, 如果你身家豐厚, 兼夾好鍾意聽人阿諛奉承… 梗係越多人向你拜年越威啦… 但係當你收入支出仲猛猛緊, 呢個時節, 真係分分鐘又要駛大幾千蚊冤枉錢… 都咪話唔心嗡…
都咁大個人, 其實都冇話貪唔貪你嗰封利是… 不過有時真係有緣狹路相逢, 見熟人唔向你拜年又唔係幾好意思… 陌生d, 我都只會同你點頭講早晨啦… 費事你要破費囉…
不過有時見到d人, 老遠望到你就兜路行, 或扮望櫥窗海報響電話, 咁就真係難睇囉… 其實你受完人恭喜之後唔派利是, 我估大部份人都可接受的, 但係你用陀鳥政策去避, 仲咁明顯, 就真係小家囉…
在此謹向呢班新年苦主致歉, 抱歉令你地行路都唔得瀟洒… 我不會向你地逗利是的, 請勿再當我仇人看待… 謝謝…