Jaffe's BLOG
前幾日決定左將iphone既 “業餘進修” app下架…
個app都運行左一年半, 從statistic睇, 都幫過唔少人… 可惜使用量遠不如預期… 眼見app store已經冒出左其他類似app… 就借呢個藉口”退出江湖”了… 畢竟要維護一個app既內容要花唔少心機… 而家私人時間少左(接近零), 無奈要放棄維護部份app了!
—
講返正題, 好日都唔用apple developer console, 前兩日想上apple ios developer console將套app下架… 發現login disable左, 話乜野例行維護之類… 等下一日, 等下又一日… 去到今日, 蘋果終於承認被黑客攻擊, 所以要落大閘維修…
啲黑客真係勁, 我相信apple既it內防絕對超越企業級… 都可以被黑客攻擊到關門大吉… 真係唔野少…
雖然我只係過客, 坐在門外食花生排隊等開門… 但我都好想知apple要閉關到幾時, 先肯開返度門俾我入去將app下架囉…
作為IT人, 大陸出差, 點少得一張流動上電話卡, 雖然公司、酒店, 及啲較大既食肆都會有免費wifi俾你用, 但始終自己手機有得上網先係王道…
本來打算在香港買張可上網既中港一卡兩號, 但係原來可上網既一卡兩號非常貴(相對), 閒閒地都十幾蚊人仔電話月費, 另加$0.1/Mb既數據費… 當慳慳地用300Mb一個月, 都要四五十蚊人仔一個月… 貴呀!
最後, 在大陸夜市閒逛, 見到有張中國聯通既大陸本地儲值卡(冇一卡兩號), 賣50人仔, 內有50通話費… 15元月費(9元基本+6元老屈來電顯功能), 包500Mb數據流量… 放棄左一卡兩號既方便, 就慳左好多… 美中不足就係要帶兩個電話返大陸…
啲條款異常複雜, 但同店員傾左一陣, 簡單黎講… 15元月費果啲就係限速3G (max. 512kb), 如果想用真正既極速, 就要另加8元(2Mb)或10元(7.2Mb)月費囉… 以我主力用whatsapp/wechat黎講… 512kb夠晒有凸了! 真係慳得一蚊得一蚊了!
雖然只係張50元人仔既儲值咭, 原來都有得揀號碼… 店員拎左一大本號碼簿俾我揀… 真係花多眼亂… 攪到要揀左大約15分鐘… 揀到一個比較易記既號碼… 雖然都冇人會打大陸號碼搵我… 有個大陸號碼點都方便左… (起碼可以登記個人人網account, 又可以縛定支付寶賬戶等等…)
返到香港, 原來張電話卡一樣用得! 只可惜… 就冇左來電顯示功能… 天呀… 6元既老屈來電顯示, 原來只係得大陸有效… >_<
有一件同工作有關既事, 到而家都未能習慣, 就係Claim Petty Cash…
出差太多, 要管理所有開支單據, 真係唔容易, 特別係交通食宿雜費都係實報實銷制, 逢月尾都要處理大量單據, 真係好頭痛…
今日算係七月中, 我已經忍唔住要處理住一半先, 以免重蹈上個月覆轍… 上個月, 要用成4個鐘先處理得晒成個月既所有單據…
不過今日雖然只處理半個月既單據, 但竟然用左4個鐘以上… 唉!
檢討左一下, 發覺原因如下:
1) 搭單
有時同同事一齊食飯, 負責俾錢既人可能係其他人, 亦可能係自己; 如果係自己俾, 有單就要在填form時填埋當時仲有邊個一齊食飯, 呢個真係超考記性, 月中填月頭, 有時真係唔記得邊餐打邊餐, 更加莫講話同左邊個食… 以後俾完錢要醒目, 有單就記得盡快在單背寫返同左邊個人食… 有時搵唔到張單, 真係會唔記得到底係同事俾左, 定係自己去食左啲無單既食店… 思前想後, 真係花費得最多時間既一項…
2) 交通費
交通費可以講係第二麻煩既項目, 因為出差既日子, 公司包晒所有交通費(包埋香港交通費用), 所以有好多無單既項目, 全部都要回想返晒, 的確好痛苦… 特別係出差返工放工, 有時係shuttle, 有時又唔係… 要組織返, 特別慘痛…
3) 無單膳食
雖然大部份膳食都有單據可以追尋, 但有時始終會去一啲無單既地方食飯, 例如一個人… 去”掃街”… 唔通叫街邊檔開手寫單咩? 掃下掃下都可以掃幾十蚊… 公司又冇明文講明有單claim幾多, 冇單claim幾多… 呢類無單既膳食, 都幾麻煩… 首先, 要記得到底係同事俾左, 定係自己俾, 如果自己俾就好啲, 是Q但claim返十幾廿蚊算… Claim少左咪當豪俾公司, 但如果係同事出左錢(又有claim), 自己double claim… 就真係冤枉了; 公司既精密會計部, 一眼就會算出你claim錯錢… 認錯事少, 俾人覺得你”呃”錢先係真大鑊…
4) 剪、貼、連單據
填寫左報銷項目後, 亦都要為每筆有單據既項目對應返關係… 簡單黎講, 係剪貼… 真係小學畢業後, 好耐未試過”剪、貼、連”呢啲小手工了…
5) 再三翻Check各項目邏輯關係
作為一個程式設計者, 有樣與生俱來既技倆… 呢樣野在電腦界叫Dry Run, 即係會將整個流程用腦黎”運行”幾次, 睇下中間會唔會有啲邏輯性既錯誤, 確保交出黎既貨唔會有啲小學雞error…
會檢查既邏輯, 有包括trip所發生既項目及其發生順序:
a) 每個trip, 我首先一定會check啲來回車船有冇claim齊
b) trip既每一晚, 我會check酒店條大數有冇claim齊
c) trip既每一日, 我又會check晒早午晚三餐有冇claim齊
d) trip既每一日, 亦都要check下有冇自己俾既車費
e) 做晒a, b, c, d項後, 最後要檢查及剔除同事幫我俾既錢, 亦都要記錄返我幫邊個同事俾左錢
做晒以上既項目… 轉眼已經過左4個幾鐘… 我真心希望係我未習慣, 否則個個月花上成個工作天黎處理呢啲雜務… 真係好浪費時間… Orz…
2013年度麥記既可樂杯換領活動已完滿結束…
我不是可口可樂副產品fans, 只會間中食下麥記垃圾食品…
個幾月前, 麥記活動開始換購可樂杯, 買任何套餐加$4就可以加大兼得到隻杯, 其實等如送俾你…
一佪麥記餐已經非常”唔健康”, 仲要俾$4加大… 除左同朋友一齊share加大薯條時會加大, 一般都唔會俾錢加大份垃圾…
在活動開始前幾日, 收到WeChat既電子coupon: 內容係憑coupon免費加大套餐兼送杯… 仲要係$21平價餐都照送, 立刻勾起左人性貪婪一面, 令到我兩星期內去左幾次… 卒之換左4隻唔同色既麥記可樂杯返屋企…
無錯, 換左既杯, 返到屋企後從來無用過, 亦都唔覺得靚… 但人就係咁, 免費送既野… 就當食個tea, 食個宵夜都去順手換隻杯…
—
言歸正傳, 打呢篇blog… 其實係回想起一件兩星期前既趣事, 一直都冇時間打blog, 趁今日有啲時間, 分享下…
話說雖然我已經換左4隻杯, 但有一日, 經過麥記, 赫然發現舖內有一則好低調既廣告, 話可以用HK$120購買一套6隻既可口可樂杯, 隨左有個紀念紙盒外, 仲送6張超值套餐連加大券…
屈指一算… 咦? 好抵喎… 就算最平既$21蚊餐, 6個都已經$126… 而家只需要$120就買得到… 仲有得加大! 我當齋買coupon送套餐都平過就咁買喎!!!
又憑住一棵貪念, 就買左呢套杯+coupon… 當買既時候, 其實都有啲奇怪… 職員好似從來無賣過咁, 竟然攪左好耐先”入倉”拎左一套俾我, 又攪左好耐先收左我$120
因為已經食左飯, 所以就直接拎左套杯返屋企, 冇用coupon換野食…
返到屋企, 正欣賞”戰利品”既時候, 發現…
咦? 點解啲餐券… 係”免費加大券”… 並唔係”免費套餐券”… 即係話… 你想用張coupon, 係要先買一個套餐!!!
—
唔駛計… 已經可以話蠢左… 之前免費換埋換埋, 貪到既所謂”著數”… 一舖已經輸凸…
點解? 因為條數係咁計的…
正常買六個餐加大就可以換齊一套杯, 如扣除套餐成本… 即係話$4 x 6 = $24就可以有加大+六隻杯
而我仲有WeChat coupon, 即係話免費加大再送杯, 扣除套餐成本即係$0 x 6 = $0就可以有加大+六隻杯
但買左呢套杯, 就即係我用$120黎買左原本係$0既六份加大+六隻杯…
啲coupon仲係有時限的, 要8月底前用晒佢 T_T
—
當諗到呢度… 差少少想喊出黎…
可以講係千年道行一朝喪… 嬴粒糖輸間廠果種fu…
差少少想換衫返去麥記退番套杯…
最後, 當然冇… 費事去到被拒絕, 仲衰多兩錢…
—
gag故講完… 但… 既然blog暊係世事如棋, 當然故事唔會咁平淡地完…
峰迴路轉之事, 下回分解…
(待續…)
“囍歡里”呢個”笑話”, 其實已經讓人笑左幾個星期…
但每逢我諗起或聽到容祖兒既”痛愛”, 都不其然再諗起市建局呢個爛gag… 難以享受歌曲原有既氣氛… 實在好可惜…
我唔係好明, 就算係重建… 好地地要將”利東街”改名… 都可以名正言順改佢做”囍帖街”丫? 點解會變左”囍歡里”呢?… 唔知邊個局中神人咁有創意, 監生將一條”街”, 變成一條”里”…
唔通將街名改成同謝安琪首”囍帖街”同名, 都要俾版權費?! 唔係掛… 如果唱片公司夠膽收版權, 市建局咪公告天下, 話改名受到阻力囉, 到時唱片公司咪即刻自動收檔, 兼免費送出版權添啦, 否則成個香港市民都唔妥佢呀…
最後, 唔知你地有無留意到… 無論”囍帖街”, 定”囍歡里讓我下沉”, 呢兩首歌既歌詞都係出自黃偉文手筆喎…
痛愛 – 容袓兒
囍帖街 – 謝安琪