Jaffe的分享空間 Rotating Header Image

November, 2009:

打你個小人頭

真係唔可以唔佩服, 鵝頸橋底既打小人阿婆, 出口成詩, 咒人都咒得有文有路, 仲押晒韻添!
 
聽下以下youtube, 小心笑到氣咳…
 

麻木

十一月既最後一個星期六, 已經急不及待趕應節… 睇左聖誕電影"魔幻聖誕頌"…
 
原本想去MegaBox feel下IMAX 3D大畫面, 點知… 上網check下已經場場爆滿… 証明d人真係有錢, 同一個地方, 普通院$70蚊張飛大把位, 反而IMAX$110張飛就爭崩頭!
 
最終, 都係選擇左英文版既普通3D版本… 始終覺得配音版本冇咁傳神, 特別係呢套… 主角既造型同聲都係Jim Carrey同Gary Oldman, 更加冇理由去睇套配音版…
 
至於3D特效, 已經無甚驚喜… 甚至感覺變得麻木… 因為3D電影實在太多, 變得普及… 而家隨隨便便一套動畫也會加入3D特效, 戲飛順手收貴十至二十元, 何樂而不為?
 
戲中最吸引並唔係故事… 而係三隻聖誕精靈, 其中"蠟蠋"最可愛, "耶穌"最攪笑, "死神"來來去去得個影, 就最陰森… 氣氛最好…
 
聖誕電影已經睇左… 咁剩返去賀聖誕既, 就應該會係"阿凡達"… 至於呢個戲名, 到而家都唔係咁鍾意…
 
自小心目中既Avatar, 就只係Ultima遊戲入面既主角, 即係"聖者"… 所以, 呢套戲如果叫"聖者", 感覺就會貼切d… 但係, 戲名叫"聖者", 又好似太大路… 叫"阿凡達", 感覺又好大陸… 改名真係兩難..
 
既然係萬眾期待既占士金馬倫作品, 真係要拭目以待…

七萬幾蚊電話費!

每次收到和記既電話費單, 都有點會心微笑…
 
想像下, 如果你收到既電話費單個個月都過萬, 你會有咩感覺?
 
和記既電話費月結單, 都幾"從實"報導… 第一次收到, "立"下眼, 其實個心都卜卜跳左一陣…
 
原來只係msn下, 睇下webpage, 數據收費就已經… -_________-"
 
無申請無限數據既朋友, 都係用返最普通既電話算啦…
 
 

富貴門

有時, 記唔記得一首歌, 都係憑一句歌詞…

近期熱爆既TVB”富貴門”, 我唔係fans, 十集有九集都冇睇… 但係佢首主題曲, 反而印像深刻…

唔知係因為旋律, 歌詞, 定係羅嘉良演繹得好… 首歌成日都無啦啦係腦中響起…

既然咁奇神, 今日決定去查下首歌出處…

原來, 曲詞都係出自陳頌紅手筆… 之前冇留意過佢既作品, 其實為數亦不少, 有d都係耳熟能詳的…

Internet就有呢樣好, 無論你既線索幾小, 追查之下, 都必能搵到源頭…

一看之下, 原來呢位陳頌紅係多媒體創作人… 曲, 詞, 專欄, 散文, 小說, blog樣樣有喎…

既然有私家blog, 就要去睇下了…
http://hk.myblog.yahoo.com/lingching918

wallpaper係兩隻貓既相, 相當吸引, 返屋企先慢慢睇下內容…

差一剎我信地老天荒…  只差一步欲望幻化星光…

貓肉鬧鐘

所謂人肉鬧鐘… 唔駛多解釋, 都知係指你家中既老母(或老婆), 朝朝係你仲訓到死豬既時候提醒你又夠鐘起身返工…
 
貓肉鬧鐘… 顧名思義, 即係由你家中既喵喵取代左你女人叫床既責任…
 
我屋企隻蝦餃(都係女), 朝朝大約七點左右就會拍房門叫我起身(包括星期六日 -____-" ), 但事實我係七點半先應該起身的… 換句話講, 即係佢日日都嘈住我訓覺, 仲係臨起身最爛訓既時候!
 
大佬呀, 日日都煩Q住我, 嘈醒我; 我一般都會好好心機起身打鑊佢… 等佢驚驚下次唔敢再拍門…
 
佢仲醒, 一聽到我開門就會飛快咁閃走, 我要追出廳先炳到佢一鑊!
 
佢拍門呢個習慣, 我已經唔記得左由幾時開始, 我估… 都維持左兩個月…
 
 
今朝, 好夢正甜既時候… 蝦餃又黎拍門…
 
我靜靜地咁起身, 靜靜地咁開門… 果然, 佢俾我昆到… 一打開門, 佢仲傻下傻下咁企定係度… 我以迅雷不及掩耳速度係佢屎忽咁打左一下, 佢即刻快閃…
 
希望佢真係以後唔好再拍門…
 
望一望鬧鐘? 嘩… 仆街! 七點八!!! 再望一望個電話… 咦… 明明較好左鬧鐘7:30 7月24, 仲係active! 但電話個鐘已經7:40, 即係話… 個電話眼白白咁望住過晒鐘都唔響…
 
日前先岩岩upgrade左個電話os去windows mobile 6.5… 即係話, 有bug!!! 唉… micro$oft d software真係屎到冇人有!!!
 
好彩, 貓肉鬧鐘冇bug…
 
 
今晚, 應該要獎勵一下蝦餃英勇既表現… "重賞小食一包… 欽此!"
 
今次之後, 我應該買個正正式式既鬧鐘了…

家用網絡更新

星期日早上… 大廈維修, 停了一個朝早的電… 由8:30停電至12:30…
 
反正我呢種懶人起身都已經下晝點幾… 朝早停電都對我無分別…
 
起身後, 發現全屋都上唔到網… 追查之下, 發現個用左兩年幾既Router D-Link DIR-615唔著了!
 
部Router, 呢兩年幾不眠不休咁幫我BT左唔知幾多Gig野; 今朝小睡四個鐘, 終於一睡不起…
 
不過, 反正有諗過換過一隻3Tx3Rx既Router, 而家佢壞左… 正係一個好機會買件新玩具配合下屋企廳部PC, PC張Wireless Adapter D-Link DWA-547一早已經行緊3Tx3Rx, 正因為部舊Router仲係行緊2Tx2Rx, 未能盡發揮威力…
 
臨急刨e-zone, 發現有隻又平又靚既Router, TP-Link TL-WR1043ND $488, 比起其他同級既平兩成有多… 雖然品牌唔夠其他出名, 但係網上口碑都唔錯, 決定一試…

美女醫務所

美女醫務所, 同美女廚房, 美女班房等無關係…
 
同日本AV更加無關係…
 
標題所謂既醫務所, 查實係一間牙科醫務所… 位於旺角…
 
我一年都會去一次洗牙…
 
係舊公司臨走順手牽羊, 續左一年兩次既平價洗牙plan… 一年兩次… $288, 年頭年尾都洗, 剛好等如一年洗一次… 除返開, 每次都只係$144, 對比起一般牙醫洗牙都三百幾… 事實係好抵…
 
第一次幫襯呢間醫務所, 已經四年前… 當年一步進呢間醫務所, 都幾眼前一亮… 在旺角某大商廈全層, 一出lift, 就係大堂, reception既兩位小姐, 濃妝艷抹… 制服著到成個空姐咁… 仲帶住甜美既笑容加上高度友善聲線, 我相信都冇乜邊個唔一見難忘…
 
四年來, 每年我都有幫襯… 証實質素無下降… 可能生意太好, 今年除左兩個receptionist外, 仲有幾個"知客", 帶領黎睇牙既人分流去唔到既登記處等候睇醫生…
 
約左兩點半洗牙, 我係兩點四已經到達… 坐係走廊等, 不斷見到好多靚女牙醫助護走黎走去, 帶客人入房…
 
在登記處都有三個年青護士係度… 工作量其實冇乜, 聽佢地都係傾下閒計… 談及天氣乾燥, 食火窩攪到鼻上出了粒瘡云云…
 
終於叫我個名… 由房間行出黎既, 係另一位濃妝小姐… 束馬尾… 對眼既化粧劃到好誇… 將本來都唔細既眼再加大左一半…! 工作袍下著了緊身褲及長boot… 真係同醫院見開既醫生差天共地…!
 
可能為左節省成本… 洗牙既工作全部都係呢位醫生做晒… 我記得, 以前仲會有一位助護的, 但而家… 就只係佢一個人做晒, 都幾吃力…
 
因為洗牙要一邊用牙醫工具洗擦, 另一方面要拿著吸管… 狂吸我不斷流出黎既口水… (註: 流口水跟這小姐無關的!)
 
小姐都好用心幫我洗牙, 期間仲不斷教我刷牙既知識… 可能我刷牙實在太求其, 佢話我好多牙石… 我諗, 真係辛苦晒佢… 我感覺到佢用鑽咀不斷係我牙縫用力洗刷… 就好似清潔一個一年冇打理既廁所般辛苦… 心裡都有少少內疚…
 
攪左大約二十分鐘… 感覺乾淨晒! 之後… 佢埋去電腦打入今次檢查牙齒既report… 好彩話我d牙都好健康…
 
佢去忙第樣野, 我先有機會望下佢間房… 第一眼留意到, 係一般港女必而既LV手袋… 在手袋旁, 係佢既文具… 鬆弛熊原子筆同Hello Kitty記事簿…
 
再留意到, 就係佢既PC上… 閃亮住幾個未覆既MSN…
 
呢刻, 還坐係手術椅上我強烈感覺, 其專業人士都係普通人姐… 制服之下… 其實佢都只係一個妹妹仔…
 
歡樂時光到左尾聲… 佢帶返我出大廳… 再由知客送我入lift… 完成了一年一度既洗牙盛事!

女友多到排晒隊

如果你係因為見到標題click入黎睇… 想知邊個咁勁女友多到排晒隊…
 
咁就証明你就好缺乏通識…
 
因為, 係人都知呢個世界會女友多到排晒隊既男人, 主要只得兩種… 一就係靚仔, 二就係有錢…
 
前者只能尋求一d腦筍未生埋既少女, 或智商未齊既中女…
 
後者, 先係天下無敵… 老中青通殺!
 
近期深圳一間婚姻介紹所就利用女人都希望嫁個有錢人既個特點做招倈… 舉辦一個叫"與富豪見面"既相親會, 等d女幻想可以借機接觸富豪, 睇下有冇機會釣到金龜…
(計我就話就只係富豪點心… 既然送入口就順手竉幸下冇所謂)
 
新聞話果12名來自中國各地既"鑽石黃老五", 個個身家都千萬以上喎… 小弟實在唔敢相信佢地會搵唔到老婆, 攪到要去婚姻介紹所囉!
 
咁雄厚家底… d女個個聽到都黐埋去都黎唔切啦! 難聽d講, 就算個男人樣衰兼性變態, 一樣大把女肯黐埋去! 冇野格, 黐埋去一個月買返十個八個LV都係返晒度…
 
以前香港男人北上搶大陸正貨… 個個自恃天之嬌子…
 
而家大陸既男人, 幢個牌出黎, 港女就搭埋火車排隊送上門…
 
香港又輸一仗…
 
 

恐懼症

尋晚返屋企, 到樓下大門口… 走在我前面, 係住我同座四樓既一位"中女"…
 
見佢企係閘門, 係手袋不斷係咁摷鎖匙… 都摷左成分鐘… 我R晒頭, 因為大廈門口其實係有密碼鍵盤既… 佢只要按幾個掣, 就可以開到大門, 而呢個密碼… 成兩年都冇換過, 佢住咁耐冇奶油唔知…
 
我企係佢後面, 渣住兩大袋惠康… 冇手, 否則我一定忍唔住伸出我既… 援手…
 
佢終於係佢個小手袋摷到抽鎖匙成功開門…
 
之後入lift, 我見佢用鎖匙篤"4/F"… 我恍然大悟, 終於知道佢發生乜事… 佢應該係患上恐懼症… 驚皮膚接觸到公用物品, 中H1N1, SIV同時兼中H5N1, SARS, AIDS…
 
呢個病引致佢對任何其他人掂過既野都產生恐懼…
 
其實有乜好驚呢!? 我諗佢應該冇睇電視… 電視都有教, 戴套咪得囉… 戴左之後, 佢以後就可以勇敢面對… 又唔驚用鎖匙篤到部lift d膠紙穿晒!
 
手套呀…

醒下啦你地

尋晚放工, 凍凍地, 搭車順路去廟街食個煲仔飯…
 
去到先發現原來真係d人個個好日都唔去下… 天氣一凍, 即刻周圍搵d時令食品… 個個唔係煲仔飯就打邊爐, 攪到廟街d食肆好似新年咁旺場!
 
特別係街頭興記煲仔飯, 嘩… 兩間舖, 兩條大人龍… 夾埋我估計都有成百幾二百人排緊隊… 冇錯… 係百幾二百人既長龍… 個個都著到成隻糉咁… 縮下縮下抵受住寒風, 目的都係為左嘆一煲$18既煲仔飯… 陰公…
 
經過第一間舖門口, 有個許文強打扮, 一身西裝大褸既男人同個舖頭師奶員工發難… 投訴等左成粒鐘都未有飯食, 一副西臉掛在大衣上…
 
我心諗, 好心你用下腦啦… 舖裡舖外都幾百人係度… 佢地煲飯得十零個爐頭, 平日都要等三四個字啦, 今日… 你要黎趁墟, 要等你又唔耐煩, 你冇野下化?
 
最後, 去左廟街轉角一間日本拉麵醫肚… 成間舖得小貓三隻… 對比起出面大排長龍都溜唔到幾個人入黎食… 真係悲哀…
 
 
每次見到過份長既食肆人龍, 唔知點解… 就會慨嘆… 唔明d人點解咁鍾意排隊… 今次咁多人, 咪下次先食囉… 你話等四五個人都話算… 而家係等成百個人喎! 仲要企係街度食風… 旁邊d舖頭又唔係冇位… 唔明d人咩心態…