Jaffe's BLOG
今日聽歌… 偶然聽到楊千嬅演唱會中, 翻唱甄妮既”最後的玫瑰”…
唱歌前一段說話中提到小王子既故事… 令我開始寫呢篇blog…
無錯, 呢篇blog唔係講楊千嬅… 亦唔係討論歌詞… 而係講小王子呢個故事…
我細個時無睇過小王子故事… 大個都唔算有…
小王子故事既內容係近年一個人講俾我聽既…
到左我呢個年紀先認識小王子, 我唔會講係太遲… 因為我覺得小王子故事唔係童話故事… 反而, 我覺得有返咁上下人生經歷… 聽/睇呢個故事反而更有體會…
小王子故事, 膾炙人口的只是”小王子、玫瑰、狐狸”的那段吧…
原因? 留待你們去發掘…
網上不少做得得很美的插畫… 與大家分享一下:
寫下寫下… 有少少懷念故事內容…
唔會再有人同我講呢個故事… 但, 我相信坊間仍有不少相關書藉吧…
有時間去書局逛逛…
今日, 中秋節長假期第二日… 晨咁早落街搭巴士去荔枝角工業區, 去sandisk維修部換返張壞sd card…
我樓下巴士站, 有兩架車係我從小到大都經常搭既… 一架係6號, 一架係6c…
以前經常會搭6號, 因為去長沙灣圖書館, 或在美孚既同學仔屋企比較方便…
而家就經常搭6c, 因為屋企人搬左去荔枝角, 搭6c會最方便…
細個時已經留意到一個現象… 就係想搭6號既時候, 偏偏一連幾架都會係6c… 等下一架, 等下又一架… 偏偏等極都等唔到…
近年都係… 每逢想搭6c, 又係會一連幾架都係6號… 等極都等唔到6c…
今朝又遇到同一個情況… 明明等6號… 但等左幾架都係6c… 今朝太陽好猛, 呆企在路邊等車, 真係精神差啲都會中暑… 等下等下, 又唔服輸等足半個鐘先等到一班6號… 講真… 行路一早到左!
忍唔住要將呢個收埋左好多年既心結寫blog了斷…
係天生無運行? 定係個天都唔鍾意我?…
其實我一早都參透到小小答案… 就係反過來想… 當你一到達巴士站, 你想要既巴士剛到… 或者等唔夠幾分鐘就上到車… 你有冇將呢件’幸運’既事放在心呢?
當然無… 對於呢啲’小恩小惠’, 人類絕少感恩牢記在心… 粗俗啲講, 幸運永遠當係’老馮’…
但有啲雞毛蒜皮既’小事’, 就會牢記在心… 例如等巴士等極等唔到呢類’小事’… 等下等下, 一件’小事’就會幻化成一件好比’好醜命生成’既’人生大事’… 無事無刻提示自己點解咁唔好彩… 點解人地’遲黎先上車’云云充滿負能量既意念…
寫呢篇blog既目的, 都只係想同大家分享下(同提下自己)… 千其唔好遇到乜事都從壞方面無限放大… 小小事都失落一餐…
P.S. 以上所謂理論, 同坊間的”巴士理論”, “公車理論”無任何關係… 只係小弟等唔到巴士啟發既小小結論
前幾日收到個好突然既消息… 就係… 我睇開戲既”主場” – 奧海城百老匯戲院… 因租約關係, 做埋今日(9月15號)… 就結業了!
奧海城戲院, 開業12年… 估計, 我超過7成入場睇戲次數, 都係算在呢間戲院既…
以前, 從一個人睇戲, 變兩個人睇戲… 回復一個人, 再變兩個人… 又回復一個人; 無論一個人定兩個人, 悲喜時光不少都係在呢間戲院裡渡過…
點解鍾意奧海城? 可能因為觀眾既質素比較好… 比較少”MK”喧嘩, 亦比較少電話嘈音…
週末既廉價早場亦成為了我健康早起既推動力…
雖然我唔係住係奧海城旁既”豪宅”栢景灣, 但勝在屋企正樓下有巴士往返奧海城二期巴士總站… 車程大概都係15分鐘, 真係非常方便…
我諗唔到以後冇左呢間戲院後… 我會減少幾多次早起? 減少幾多次入戲院睇戲…
但我唯一諗到, 就係在結業日, 去睇”最後”既(早)與(夜)場… 亦都係我平日幫襯最多既兩個場次… 只想到呢種方法去送別陪伴我十收年既呢間戲院…
今朝一早就去買左早場戲飛(猛火爆2), 順便買埋夜晚戲飛(孖Gun雙雄)…
戲院每個位置, 都有人影相留念… 大概都係收到風話做埋今日會結業掛? 但… 戲院範圍內, 完全冇半隻字提今日係結業日… 唔明… 咁低調, 唔通仲會有乜玄機?
尾場散席後, 才步出戲院走廊, 已經見到所有電影海報已除去… 只剩下一個個大型燈箱…
目送搬運工人一車車將電子器材搬離戲院… 連自助取票機的面版也被打開… 原來來裡只是一部很普通的桌上電腦 😛
原來不少觀眾也是專程來送別這戲院… 大家都很不捨地再為每一個角落拍照留念…
我慢步離開戲院, 通往商場去, 仍不時回頭再看這充滿回憶的地方…
走著, 這十數年回憶, 一下子湧上心頭… 時日原來過得那麼快… 多年前的往事, 彷彿就如昨日一像清晰…
