Jaffe的分享空間 Rotating Header Image

December, 2009:

Cloud Computing本能

講到"cloud computing", 聽落好似好複習既技術, 但係呢樣野, 本來就人人都識…
 
今日, 各同事為一位新婚同事寫結婚賀咭…
 
同事A: 唔識寫添, (向同事B) 哎, 不如你寫先!
同事B: 好難諗喎! (問同事C) 應該點寫架?
同事C: 上google search下咪得囉!
 
之後, 同事A, B, C都努力去google search下有冇咩結婚賀語… 好快, 三句好"行"既賀詞就寫好左…
 
跟手賀咭陸續傳俾同事D, E, F… Z, 見到好多同事desktop突然狂search google, yahoo, baidu…
 
有d同事會自己上google搵, 有d會問隔離果個, 隔離又會再問隔離, 最終一個會叫返佢地自己問google…
 
最終, 個個都係問google… (未有google前, 唔用腦都係靠問隔離, 最終都會有個識)
 
Cloud Computing, 咪就係呢d囉!
 
漸漸, 人腦會退化, 坐係pc面前就能知天下事, 唔駛思考, 簡單至1+1=, 複習至強子如何對撞得出上帝粒子都可以問google…
 
人類變成無腦袋thin client, fat body…

我何以雙眼好像流淚?

09年既12月, 千嬅盛放…
 
由心口掛住勇字既傻大姐搖身一變幸福丁太… 唔駛再唱埋d悲曲… 乜鬼野"吻下來豁出去", "傷心就旅行" 兼 "數你數到彼此也蒼老"…
 
而家可以大大聲咁向大家唱"抬起我的頭來"…
 
楊千嬅呢隻碟收錄超多勁hit既好歌… 簡直係林夕歌詞大合奏…
 
96年至06間既精選, 真係近乎包括每首至愛…
 
失戀藥方, 總有一兩劑會沖服楊千嬅歌詞; 偶爾觸到患處, 痛得兩行眼淚直流, 病況先得以舒緩…
 
CD1
1. 狼來了
2. 再見二丁目
3. 直覺
4. 友誼萬歲
5. 手信
6. 數你
7. 大激想
8. 因為所以(畢氏定理)
9. 愛人
10. 抬起我的頭來
11. 夏天的故事
12. 冰點
13. 木偶奇遇記
14. 最後的歌
15. 少女的祈禱
16. 如果東京不快樂
17. 可人兒
 
CD2
1. 姊妹
2. 野孩子
3. 悲歌之王
4. 假如讓我說下去
5. 河童
6. 楊千嬅 (變身Remix版)
7. 閃靈
8. 勇
9. 向左走向右走
10. 小飛俠 – 楊千嬅 / 蔡德才
11. 可惜我是水瓶座
12. 笑中有淚
13. 我是羊
14. 飛女正傳
15. 稀客
16. 咬唇
17. 寒舍
 
CD3
1. 小星星
2. 自由行
3. 小城大事
4. 處處吻
5. 煉金術
6. 烈女
7. 簡愛
8. 長信不如短訊(長痛不如短痛)
9. 花與愛麗斯
10. 超齡
11. 火紅火熱–楊千嬅/梁漢文/ 鄭中基/ 何韻詩
12. 我的醉愛
13. 大傻
14. 我的生存之道
15. 芬梨道上
16. 郎來了(ROSE)
17. 滾 – 楊千嬅/梁漢文
 

笑看風雲2

未入戲院, 朋友已經表明立場; 入戲院只求消磨時間, 千萬不要抱任何寄望…

係賣弄已經睇到厭既cg特技? 定係賣偶像? 我覺得係後者, 淨係郭富城鄭伊健, 已經爭取到唔少觀眾入場…

賣點當然仲有久未露面既何家勁同人氣型男黃德斌, 都值回唔少票價…

睇風雲唔會抱期望睇故事… 只求兩粒鐘唔好太多悶場…

可能apm既音效麻麻, 舞刀弄劍既場面真係好刺耳… 似一堆爛銅鐵胡亂敲叫多過乜野絕世武器格鬥…

 
似gag非gag既劇情的確可以令觀眾醒神些少, 真係有得笑下都好…

成套戲, 最欣賞既都係無名為步驚雲既絕世武功取名一幕, 觀眾真心笑出黎… 少d心血都絕對會笑到抽筋吐白沫身亡…

勉強都可以話套戲好頭爛尾, 劇情越做越收唔到科… 結局肯定可以冠以草草了事榮銜…

或者… 到喉唔到肺既結局去安排下一集都係明智之舉, 不過下一集, 真係要諗過一d新卓頭先會再吸引到觀眾入場… 或者, 試下4d丫, 等觀眾都感受下劍氣擦臉而過都係好既…

行路打倒蹆

人衰行路打倒蹆, 我諗大家都聴過…
 
每朝搭地鐵返工, 對呢句說話有更新體會…
 
好多人朝早返工搭地鐵鍾意睇免費日報, 企響度睇到入晒神仲要雙手離開晒扶手… 靈魂出竅咁…
 
當列車dup停或加速… 一個個自動導航既冇靈魂驅殼, 同時向後踏步… 經常踩到無辜者既腳…
 
小則著猄皮白色鞋, 多得你唔小! 大則著露趾鞋, 腳趾都被踩扁…
 
如果撞岩係青春無敵豆令踭OL, 受害者更加欲哭無淚…
 
好多人一次又係咁, 兩次又係咁… 呢頭dup車蹆後, 果頭再dup又蹆多次, 永不悔改…
 
呢d仲唔係人衰行路打倒蹆既佼佼者!?
 
 

籌款(當做)Show

今年度歡樂滿東華又完滿結束… 善款再創新高…
 
籌款節目, 唔好意思都講句… 一年Hea過一年… 以前d明星歌星都好用心去練習高難度表演, 觀眾拍爛手掌之餘, 總理亦大力捐錢…
 
快餐文化風氣盛, 而家d表演, 得過且過… 明顯欠缺練習, 是是但但算… 表演錯漏百出, 總理們企係旁邊滴晒冷汗, O晒咀…
 
最後要由司儀打完場, 老屈總理每人十萬…
 
錢, 總理大把… 鬆下手都十萬十萬咁捐, 不過有關表演成唔成功, 觀眾有眼見… 有錢出錢, 表演者們, 到底有冇真心出過力?
 
 
另外, 觀眾們唔知你地有冇打過捐款熱線… 我一生人只試過一次, 原來… 打電話認捐既手續都係好Hea的…
 
熱心既大使, 會問你姓名同捐款額… 抄低後, 就會叫你"自己"將善款存入某某戶口… (攪錯, 咁我最後有冇捐佢都唔知啦)
 
我唯一一次打電話捐款… 貪得意, 期望會係果條用慢鏡重播都嫌快既roller上搵到自己既名同善款… 發現佢只將我個名打左做"凌先生", 真係十萬個冇誠意, 十萬個Hea…
 
當然, 我冇一怒之下反口唔捐… 不過就覺得呢種捐款方法就真係無聊之極…
 
同時, 好佩服果d留超長名捐款既人… 例如: "荃灣聖公會陳大強紀念中學夜校2B班師生仝人", 又或者超難讀寫既名… 例如: "譙偃巇"… 唔知佢要電話大使覆幾多次先成功無誤咁播出…
 
仲有無數既"無名氏", 既然唔想留名, 又何須專登打個電話上去留無名氏呢… 自己走去銀行入數就可以了!
 
不過無論點都好, 有善心係好既, 祝各善長福有攸歸…
 
 

印花有價

繼OK印花換鬆馳熊, 而家7-11亦唔執輸, 出返Hello Kitty Charm還擊, 成功搶回便利店客戶…
 
OK採用抽印花儲份換鬆馳熊產品, 積分唔難儲… 好容易就夠一百分, 換購水杯… 禮品款式亦唔多… 好易儲齊…
 
今次7-11黎個大堆頭, 35款Charm加兩款手鍊同埋掛飾架… 真係保證買到你窮…
 
買滿$20蚊一個印花, $30蚊兩個… 如此類推… 滿十五個印花就免費換一款Charm,  但係… 世事並冇咁簡單, 換一款Charm, 係要抽既… 即係代表你冇得揀… 要一搫即中心儀款式, 真係冇乜可能…
 
既然成本咁重, 花少少錢去Yahoo競投人地多出黎既款式, 都係一個好選擇… 因為保証可以得到心頭好…
 
搜尋之下, 發現原來唔止Hello Kitty Charm有得賣, 淨印花都有得賣… 價錢仲… 唔平…
 
印花平均價為$5蚊一個… 一般賣家都會一百個一百個咁賣, 即係$500蚊一套…
 
咦? 去7-11買幾多錢先會有一百個印花呢?… 屈指一算… 原來$1010就可以有一百個了… 如果一百個印花可以賣到$500蚊, 咁… 即係我可以半價買7-11既產品了… 香港人真係聰明… 咁都可以套現…
 
講返真正想要Charm既顧客, 印花始終係印花… 去抽Charm, 就算用晒一百個亦唔能夠抽齊一套…
 
如果直接買, 價錢又如何呢?
 
上Yahoo一睇, 原來一隻Charm賣$40蚊… 咁… 計起黎, 一套Charm35款, 都要成$1400蚊!
 
鍾意Hello Kitty又收到Order儲一套既朋友, 真係祝你好運…

飲啡室文化

如果唔係等人, 我絕對冇咁既閒情日誌, 去pacific coffee呢類地方嘆咖啡…
 
剛入店, 已經見到每枱坐上客都不約而同"幢"出一本netbook, 全神貫注… (似乎係坐cafe既新dress-code)
 
剛好有人走, 我一個人霸左張小圓枱, 只叫了一杯ice mocha…
 
(仍然好唔鍾意佢地用懶係流利既英語+高八度叫我拎飲品… 毛骨悚然)
 
我唔out, 拿拿林拎本netbook出黎扮有網要上, 不甘示弱…
 
抱歉呢篇blog打到一忽忽, 因為我只係迎合文化, 隨便拎本netbook出黎打篇blog, 以示我已融入飲啡室文化…
 
我唔鍾意扮relax既感覺, 更唔鍾意扮創作人(包括在街外cafe飲野途中突然有靈感創作)
 
所以, 在此收筆…

狗飯餸

打工仔, lunch食飯幫襯茶餐廳最普通不過…
 
每個人都食過ABCD餐… B同D餐叫法相似, 所以好多聰明既伙計阿哥阿姐就會將佢地稱為"boy餐"同"dog餐", 以防混淆…
 
B餐叫"boy餐"都尚可… 但係D餐被叫成"dog餐", 我個人就覺得有點兒那個…
 
叫D餐, 跟飯… 就會變左"dog飯"…
 
有時d野, 難聽就係難聽, 冇話咩諗多左…
 
曾經見過d餐廳, 係ABCE餐, 專登跳過D餐… 我見到, 不其然暗暗稱讚, 因為咁做一來跟顧客免生誤會, 二來跟廚房亦都唔會出誤會…
 
回想起兩年前, 深水埗曾經有間車仔麵舖… 推出一款套餐, 個名真係唔嚇死都笑死… 叫做"九餸麵", 意思指呢款麵包括九款餸在內… 我都覺得幾抵食… 但係個名… 真係不敢恭維…
 
我食過三次… 頭一次係貪新鮮試下佢果九款餸… 第二次… 就真係欣賞佢翻尋味…
 
但係, 頭兩次我都實在講唔出… "唔該, 我要狗餸麵"… 所以頭兩次我都係"唔該, 我要果個…", 跟手指下"九餸麵"張海報…
 
我諗都有唔少人反映過俾舖頭聽, 個名實在難聽; 我第三次去, 佢已經將"九餸麵"呢個偉大既名改為"九寶麵"…
 
所以我第三次食, 就可以大大聲聲咁叫"唔該, 我要九寶麵"…
 
唔駛再食狗餸…

冇鞋挽屐走

邊個話政府部門做野慢?
 
返工無耐話年尾搬位… 卒之係上星期五下午, 毫無心理準備之下… 收到通知即日搬位…
 
搬位意思, 係連張枱一齊搬… 說時遲, 那時快… 仲未將枱頭物件好好收拾之際… 已見到搬運工人殺到…
 
我張枱係舊房第二張… 佢地會先搬拆我前面果張枱; 所以, 我只得五分鐘時間收拾…
 
好彩既係, 新電腦既紙皮箱仲未掉…
 
我即刻以惠康免費1分鐘任掃貨既手法, 將超凌亂枱面上既所有物件(包括水杯)大手掃入紙箱內… 果然不到一分鐘, 我已經將L枱所有物件"收拾好"…
 
仲剩四分鐘時間將枱上電話, 電腦及Mon好好折線同搬離枱面, 好讓搬運哥哥送到我新位置上…
 
對於新坐位, 可說係有生以來… 最無間道的, 因坐位正正背著親愛既大老細及老細, 坐位上所有活動皆隨時可被監視…
 
此刻, 只諗到一句: "生有時, 死有時, 笑有時, 哭有時, 哀痛有時…" 我以後既日點過呀?
 
真係十萬個仆街…
 
 

蔡瀾品味

今集變左tvb廣告特輯, 介紹citizen電波光動能錶, sony最新電子產品…
 
開始對呢個節目失望…
 
tvb錢字掛帥, 每個節目(包括劇集)都強加入廣告特輯變成節目一部份, 自欺欺人… 攪到不倫不類…