Jaffe的分享空間 Rotating Header Image

April, 2009:

最後勝利

世界上, 好多無理由既事要面對… 不過原來用心觀察, 真係可以解決唔少怪問題…
 
由買左機頂盒開始, 奇怪事發生了… 唔知點解, 每次開著電視旁邊既HTPC, 高清翡翠台就會受干擾爆格, 疾到睇唔到… 不過任由電腦idle半個鐘, 就可以同時開住電腦睇高清台… 但只要稍為移動一下mouse, 高清訊號又會被干擾…
 
開頭都好有信心係無線mouse, 因為直覺訊號干擾, 應該會係無線電波… 不過… 試左唔係, 拔去mouse一樣受干擾! 再試一下拔去音湶線… 又唔係… 再轉換一下電腦電源插頭… 都唔係… 攪到個心灰晒… 百思不得其解… 唯有繼續逐件試…
 
拔拔插插之下, 收窄範圍至到連接電視與display card之間既hdmi線, 每逢唔插條線, 高清訊號就接收無問題了…
 
試過將hdmi線遠離電視天線, 開心左一陣, 又睇到喎… 不過時間耐左, 時得時唔得… 將條線拔走, 又得返… 真係R晒頭…
 
最後, 把心一橫… 換過一條新hdmi線… 本來信心都不大… 但世事往往就係咁, 你冇乜信心之下, 好神奇地… 爆格問題冇再出現過…
 
雖然最後勝利(好似), 但已經身心俱疲; 希望怪問題唔會再出現啦~

屈得一蚊得一蚊?

由細到大都以為超級市場買野係平… 係近年去買野多左, 先發覺原來d野可以貴得咁緊要…!
 
如果你唔係超市既常客, 你唔會發覺佢地既價格可以變得咁快… 一桶裝既雪榚, 星期四可以係$34蚊, 星期五去… 發現佢可以加到$68蚊一桶, 仲要話你知今期超值… 加$1可以買多桶… 咦? 即係屈你一定要買兩桶… 再屈多你一蚊添!
 
益力多, 個價仲浮動過海鮮… 高峰係$18.5兩排… 最平係$15.5兩排… 真要記住要經常留意價格…
 
另外, 你唔好再比較佢label出黎既原價同特價… 因為個原價原來可以不斷浮動… 等你以為佢減得好多… 一件平時只要$8.9既點心… 今日特價$9.1… 仲要屈你買足4件先有返呢個優惠…
 
前兩日經過普通藥房(唔係屈人寺, X寧果種), 順道買支洗頭水… $35… 先覺醒, 被超市欺騙左咁多年… 超市係標原價$65… 特價賣$55… 仲等你以為好著數添…
 
佢地既廣告口號, 慳得一蚊得一蚊… 我諗… 我都真係要聽下佢地話… 儘量去少d… 咁先可以達到慳得一蚊得一蚊呢個效果…

強完又強!

今朝收到強積金公司打黎俾我… 發現原來三月初政府向月入低於$10000人士強積金戶口注資既$6000大利是… 我都有份喎!
 
不過, 佢地打黎並唔係恭喜我… 係打黎話俾我知注錯款… 而家要收返~ 而且係冇得yes或no, 只係通知… 即係夾硬拎返$6000走, 咁… 可唔可以扣返呢幾個月戶口投資蝕左既錢, 同埋經紀費呀!?
 
你$6000黎, $6000走… 配合呢個時勢, 變相我戶口咪做左你既資金避難所!?
 
其實佢打黎之前, 我一直都唔知有注錯款發生… 強積金個戶口, 個個月都黎強姦我人工… 已經俾佢強到冇晒感覺, 仲邊會有心情去睇statement丫… 反正d錢要退休先可以享用, 到時已經唔知係乜世界, 同埋… 根據某具智慧人士計算… 當我65歲退休既時候… 戶口都積到百幾萬既… 但係… 到果一年, 港幣貶值到當yen咁駛… 可能雲吞麵都成幾千yen一碗… 靠佢果百幾萬yen… 唔知我既退休生活有幾堪苛呢可?
 
之前政府公佈有強積金注資錯誤, 又出黎解釋(掩飾)因為又乜又七可能性, 話可能因為d公司兩星期出一次糧, 又可能係份工做唔夠一個月, 做幾日轉左工物物… 車… 我份工, 由07年12月至08年2月… 一直都冇佢地所謂既可能性出現過…
 
做野唔小心就唔小心啦, 錯咪認囉! 唔好再搬咁多借口出黎賴落人地度啦唔該…

醜陋白領

見到標題, 會聯想到d乜呢?
 
可能會即時聯想到一d唔靚既OL?
 
其實唔靚既OL一街都係, 不值一題… 但係記起上星期五返工時候, 係金鐘地鐵站見到既一件事… 令我隔左成個星期, 都要寫BLOG一洩心頭怒氣…
 
話說, 星期五早上… 搭荃灣線, 到金鐘轉乘住柴灣線月台上… 有一部"傷殘人士"專用既升降機… 平日往往都俾大量連扶手電梯都懶搭既健全廢人佔用…
 
平日冇人用, 你地佔用就算了… 星期五當日, 眼見電梯門一打開, 九千幾個唔知趕乜撚既健全廢人湧晒入去… 反而排住隊既一位輪椅哥哥, 最後反而入唔到去… 電梯內, 門前一群白領, 對電梯門外既輪椅哥哥視若無睹… 完全冇諗過需要讓出空間…
 
視線仲一直故意離開輪椅哥哥; 慘被遺棄既輪椅哥哥就係升降機前… 睇住電梯門隨隨關上… 最後都係冇人讓位…
 
回想起, 當日望到呢群衣著光鮮既白領, 一副好唔捨得讓位既神情… 個個左右迴避既眼神, 努力等待電梯門早點關上… 方便了自己, 抛棄了真正有需要既人…
 
 
就算你衣著幾光鮮, 幾有錢, 受過幾多教育, 緊急關頭… 如同蠻人一樣咁去佔據別人利益, 成全自己嗰點點既方便…
 
眼見都心痛… 低等人性表露無遺…

千金散盡還復來

我始終係一個討厭電腦既電腦工作者…!
 
自從買左htpc電腦之後, 在家中娛樂消閒既日子一直都唔好過… 先有早期既hdmi兼容性長期實驗, 之後既pc無故reset研究… 直至最後階段既顯示卡/火牛/底版/cpu誰是真兇死機之迷…
 
大大話話都投資左額外三千幾蚊落去… 先叫可望有安樂日子過…
 
最後, 差唔多所有套件都換晒了!
 
由原來既 AMD 5200+ / Gigabyte 580G / 跟機400w火牛
 
變成而家既
 
Intel E5200 / Asus p5qpl-vm / Asus en9500gt / Corsair vx450火牛
 
我都係想玩下電腦開心下姐… 駛唔駛咁多煩惱呀!?

看破是智慧、放下是功夫

執拾房間時, 找到一本買了好幾年既書… 內容大概是佛計解讀云云…
 
唔明當年點解忽然有一段時間對佛法非常好奇, 一句句深奧既佛計… 睇得津津樂道…
 
隨便翻開心經, 心無罣礙, 簡單四字, 原來已經深藏道理… 要充份明白, 須花費上數天時間…
 
 
對於無能力解決的煩惱, 我會努力放下…
 
依據法理, 我只係一個無智慧既人…
 
放下只係舒緩既功夫… 只有看破才算得上智慧; 放得下, 煩惱依然存在… 看得破, 那根本不存在煩惱… 又何需放下呢?
 
又好似好有道理喎…
 
 
我只是一個凡人, 絕對相信, 就算將書翻破, 我都未能夠將我既煩惱一一看破…

勇氣可嘉

睇完呢兩段片, 其實我會欣賞佢既勇氣同自信!

做到俾人當面揶揄都可以臉不改容, 呢d先係成功既關鍵…

"愚人節快樂!"