Jaffe的分享空間 Rotating Header Image

March, 2009:

睇下點

好多人都試過要求人幫忙, 或者約人聚會… 會遇上人答: "睇下點…"

其實呢個係一個好乞人憎既答案… 到底, 睇下點… 呢一點, 係邊度既呢? 呢一點, 易唔易睇既呢?

好明顯, 對方已經將你既請求攝左係一個好低層次既位置度… 明眼人都應該明白, 你… 都係找定後著吧啦… 唔好寄望佢會答應…

不過, 最近先覺得… 其實"睇下點"呢三個字, 已經算係比較簡潔… 對方向你講呢三個字, 已經俾足面了…

A: "聽晚同一班舊同學食飯, 你去唔去呀?"
B: "睇下點…"
(即係: 睇下條女約唔約我, 睇下我約唔約條女, 睇下我有冇心情, 睇下你地食乜野, 睇下價錢貴唔貴, 睇下多唔多人, 睇下邊個會去, 睇下幾點去, 睇下股市升定跌… 下刪幾萬條rule)

A: "咁即係點?"
B: "未知…"
(即係… 將未知代入以上既睇下就ok: 未知條女約唔約我, 未知我約唔約條女, 未知我有冇心情, 未知你地食乜野, 未知價錢貴唔貴, 未知多唔多人, 未知邊個會去, 未知幾點去, 未知股市升定跌… 下刪幾萬個未知… 所以要睇下…)

人地向你回答"睇下點"… 你千其唔好有hard feeling… 因為只係佢太多野要睇…

其實佢已經答左你: "我好忙…"

A: "Bye~"

港男、港女

點解… tvb個節目可以咁? 睇完港女一集, 本來都好期待港男呢集… 但係… 星期日睇完之後, 只可以講一句"大失所望"… 我希望既, 係睇到港女對一個正常既港男有乜睇法, 而唔係對電車男既睇法囉唔該!

tvb用左電車男黎做港男代表… 成個節目都係圍繞住呢班特殊份子, 雖然港男不乏電單男在內… 但係偏離主題去左電車男度, 作為港男一份子, 實在禁唔住有被"屈機"既感覺…

想問, 節目監製係唔係女人黎呢? 點解港女一集… 訪問親既港女都係五官標緻, 牙尖咀利, 事業有成? 港男呢集, 訪問親既都係不修編幅, 黐脷根, 滿口懶音, 沉溺上網動漫既人辦?

作為忠實公平既題材研究… 其實今集貫切港女一集, 搵d事業有成… 有權選擇既港男出黎, 講下點解佢地咁多港女唔揀, 都寧願返大陸娶老婆, 咁先夠公平公正… 你搵d連選擇都冇機會既電車男黎批評… 咁梗係班港女贏晒啦, 個個都事業有成, 觀音兵無數, 又點駛揀個電車男呢!?

如果要拍成咁… 就不如上一集你都搵d豬扒兵團, 黎襯返今集既電單男部隊啦?

tvb… 你大細超喎!

港女與香港腳

近期"港女"呢個名詞, 再一次成為城中熱話… 因為TVB星期日檔案又黎無風起浪, 將港男港女呢個名詞再次擺上枱…

我覺得, 香港女仔對"港女"呢個名詞太敏感… 一聽到就好似自己受到岐視侮辱咁… 其實, 又唔需要咁敏感既… 你係咪係, 唔係咪唔係囉…

"港女"呢個名詞, 冇錯… 的確適用於一d擁有劣質行為既香港女仔, 但係… 名詞始終歸名詞… 雖然叫"港女", 都唔代表一網打盡全香港既女性既…

就正如"香港腳"… 唔通話人"香港腳", 又等如侮辱晒全香港既人咩!?

女仔們… 大方d啦…

阿嬌亮相熒幕… 廣管局接463宗投訴

睇到呢個新聞標題… 個心有d唔舒服, 唔舒服不在於阿嬌亮相… 而係概嘆點解會有咁多無聊人走去投訴?

眾年青藝人出左事, 一沉百踩… d人究竟抱住咩心態呢?

我絕對肯定, 同抑止社會歪風沒撚關係… 大多數投訴既, 我相信都會係"唔抵得"佢地藝人個個都年青貌美, 有錢有面, 伴侶不絕, 亦個個高質, 兼性生活刺激美滿… 赫見某藝人意欲重返藝壇, 就設法干擾抗議…

我唔相信做左藝人就冇性需要, 我唔相信做左藝人就只懂男上女下, 我唔相信做左藝人就唔可以口交, 我更唔相信藝人會變市民榜樣…

你覺得佢地出鏡篤眼篤鼻, 唔鍾意佢地, 咪熄電視, 唔睇報紙, 唔睇雜誌, 唔出街, 唔上網…

我相信大部份投訴人都唔止同一個人做過愛, 更加唔止做過男上女下… 咁點解你可以接受自己係咁, 唔可以接受到人地呢?

無聲絕交

久唔久都會上facebook hea下, 我個friend list一向都徘徊係200個人左右…
 
印像中, 曾經試過最多203… 亦試過跌到200以下… 奇怪既係… 點解friend list既friend會減左既呢? 唔通有人唔妥我, 決定唔同我做friend?
 
但係… 究竟邊個係friend list裡面消失, 我又唔清楚… 因為我從來都唔會check個friend list到底我有邊個friend"登記"左…
 
有時候, 久唔久都會有一兩個唔識, 但係又好似有dd間接關係既人add我facebook, 當然, 我都好少會ignore或者reject (除非係仔, 唔靚女, 結左婚, 生過仔, 身材唔好等等…)
 
但係add左之後, 其實我地都係唔會傾計, 唔會留message, 唔會msn, 唔會有交流… 我唔明佢add我黎做乜呢? 可能, 有人會覺得個friend list有幾百幾千個"friend", 就等如佢廣交朋友, 人際網絡強勁… 足以自豪!
 
放心, 我… 絕對唔介意為你既facebook friend list做勢, 做佈景… 我唔會delete你的…

與巨無霸晚飯

今晚, 一個人去麥記食晚飯… 如常, 都係叫左個巨無霸餐…
 
落住微雨既晚上, 餐廳唔知點解竟然比平時多人… 好采搵到一個單人位… 岩岩坐低, 發現視線前有一妙齡少女, 背向住我… 視線好快就俾佢背脊褲頭上既兩團肉吸引住…
 
吸引之處, 係差唔多有兩份赤道以上北半球已外露, 但係竟然仲見唔到底褲邊, 呢條褲果然稱得上鬼斧神功…
 
我好專心咁食自己買既巨無霸餐, 但係同時亦好唔專心咁不時望下眼前呢兩個疑團… 過左十數分鐘, 呢位姐姐仍然好努力咁烏住個身去食佢既美味晚餐… 作為一個男人, 我都就快開始頂唔順… 想幫佢"丘"返正條褲…
 
就係咁… 我就望住左呢兩個半露既巨無霸, 完成左我既晚餐…