Jaffe的分享空間 Rotating Header Image

Samsung Evo Plus 64Gb SD用在DJI Mavic Pro可以嗎?

睇落好簡單既一個問題,但原來我在網上搵左都兩三日,完全無人試過呢個組合,或者,係無人post文話比其他人知係可以的…

上個星期行黃金,見到一張Samsung Evo Plus 2017年版,標明自己可以錄4K,價錢只係一百六十幾,以其他所謂4K既快咭黎講,呢張咭價錢就好似打左七折,五折,四折咁… 真係超值…

當然,一分錢一分貨,好多sd card既spec都出古惑既,標榜有幾快幾快,到最後歸根究底都係讀得快,寫得慢,對於想真正錄4K片既師兄黎講,都係得啖笑… 當然,速度唔達標又係另一個問題… 所以,買咭前網上做下資料搜集,係好重要既…

張Evo Plus 2017年版,其實在6月已經出左,我就好奇怪點解仲未有人寫對Mavic Pro既兼容測試,不過,留意到既就係,好多師兄都大力鼓吹用貴咭,並以用貴咭為榮,勁舉出好多貴咭既好處,測試網頁資料等,去FF自己用左四五百蚊買咭既事跡,當然,有米既師兄好多,我唔會話貴咭無佢既好處,但我都好提倡節儉既,如果百七蚊做到相同既效果,又何需去用三百或四百蚊黎做呢?

何況,呢啲存儲媒體只會不斷乏值,今年用百七蚊買既野,下年應該唔駛一百了… 咁何必浪費錢呢?下年用個差價再買啲時令又CP值高既咭咪仲好…

好,講左咁耐,去片先… 人生第一次youtube既教學片,之前睇就睇得多,但自己拍都係第一次,求其係求其啲架啦,但志在快手快腳咁可以推到條片出街,造福人群,我相信都一定會有師兄想買呢張咭比Mavic用… 但心大心細…

睇完片,就講多少少拍教學片既經驗,原來準備功夫都要幾足,否則一路拍一路講野原來唔係咁易,好易deadair(好彩剪接可補救),同埋要清楚自己成片條既舖排囉,否則唔知做邊樣先邊樣後,亂晒…

另外,focus原來都好重要,好似我條片咁,主體時近時遠,自己又生手,兼顧唔到,最後拍左出黎條片好多時都out住focus黎講野…

同埋,另一樣對youtube幾滿意既係,加字幕功能幾好用… 加左字幕,就可以照顧埋啲唔識廣東話既人啦!(好似好勁好多人睇咁 ORZ) 我始終覺得通過search engine,總會有啲外藉人士都搵緊呢個測試既…

真心覺得咁拍教學片係幾好玩,有機會都會繼續拍,幫到自己,亦幫到人呀!

香港人到台灣租車,要先換國際牌嗎?

下星期將會到台灣自駕旅遊,回想起過去幾次台灣旅遊都有租車(私家車,電單車,單車等),好懷念台灣市區滿街既汽油味,同郊區既清新空氣

在之前,我準備去自駕遊時都會去運輸處申請一張叫國際牌既外地駕駛執照,今次亦不例外,誰不知上網準備填表時,神推鬼湧睇一睇承認香港國際車牌地區,竟然無左台灣!R晒頭,然後好直覺咁去google一下,原來有人話2016年6月開始,台灣己經不在呢個列表之中,咁其實又唔係一件壞事喎,因為台灣聲稱香港係互惠地區之一,所以香港既駕駛執照可以在台灣租車,唔需要專登換國際車牌了!

其實台灣應該一早就咁做啦,大家一早已經friend左啦,見簽証咁方便就知! 好似之前去關島旅遊,都係直接用香港車牌就OK,唔駛專登去運輸處攪手續,仲要慳番80蚊!

我今次去台灣,準備在幾個地方自駕電單車(機車)周圍遊玩下,以我既性格,問定無蝕底,我呢兩日分別聯絡過台北,宜蘭同花蓮既租車公司,確定清楚係唔係直接用香港車牌(駕駛執照)就可以租到車,唔問由自可,一問個心就離一離,因為每間既答案都唔一致架!

首先,台北既公司話,係唔駛的,不過要駕照上顯示可以駕駛機車就得了,對我地香港牌黎講,無問題啦,背面都寫得好清楚電單車既編號,又有晒中英文,淡定;可惜,宜蘭同花蓮既租車店,就不約而同咁堅持要有國際牌先可以租車,我解釋過網上既互惠地區一事,但佢地都唔理啦,話無台灣駕駛執照,就要國際車牌呀!

好彩有問,否則去到先發覺唔比租車,就好掃慶啦!又好彩香港申請國際車牌只係15分鐘既事,只要帶身份證,兩張相,地址証明同80蚊就可以直接到運輸處申請(原來唔駛用香港車牌的,呢個攪笑!)

寫呢篇文就係想提醒下香港既朋友,雖然道理係唔駛申請國際牌,但租唔租比你,真係好睇個別既租車公司,用80蚊換個安心,點都係好啲架!

祝旅途愉快!

(國際駕駛許可證申請表)

(承認香港國際車牌地區一覽表,無台灣架!)

(香港國際車牌封面)

(香港國際車牌內頁,有你既照片,同埋地址,仲會註明可以駕駛既車輛種類)

如何關掉ZTE手機的開機聲音

看似係一個好簡單既問題,但我真係比呢部手機既開機聲煩左幾年,雖說係後備手機,但每當出trip、去旅行,都一定要用部手機share wifi

但當去到一啲唔方便嘈既地方,要restart呢部手機,真係好唔方便,因為佢開機真係好大聲,煩到人,又令自己尷尬

試過將部機轉去做silent mode,或將所有音量較到,開機一樣震撼;網上google左好多人,原來都有呢個問題,就係搵唔到熄左呢個開機聲既方法;當然,有人教root機去disable startup sound,亦有人教安裝google assistant之類既app disable startup sound

當然我兩個方法都試過,強頑既祖國android真係唔怕你,完全disable唔到開聲既偉大聲音

有時啲野就係咁,有人無意中發現原來開機聲真係有得熄,個位置仲係好”合理”添,開始唔明點解以前會搵唔到

settings -> sound -> 去到最底 (power on sound) 熄左佢就得左,唔通係新firmware/os加落去既?以前真係無架喎! >_<”

手機流動數據用量用完點算好?

自從換左iphone 6 plus之後, 啲數據量不知不覺好似倒水咁倒…

日前, 忽然收到數碼通一個SMS, 話我既數據用量”就快”用完… 都未夠5分鐘, 就再收到另一個SMS… 話我既數據用量已經用完… 即刻停左我既4G數據, 攪到我無得上網… 要收我$100先可以加番額外1GB流量比我喎!

limit_warning

傻的嗎? 我用左iphone 5, 6年… 由3G用到而家4G… iphone 3用到iphone 6… 都從來未試過爆limit… 因為以前都叫無限流量(不過我收月結單, 都大約每月2-3GB之嘛)… 後來轉左iphone 6, 無左unlimit plan, 但我續左最高流量既合約(6GB), 諗住萬無一失啦… 點知… 用左2/3個月就爆左limit…

傍徨之際, 又唔想俾$100益數碼通買果1GB…

就諗起之前行鴨寮街果陣, 留意到街邊啲電話卡檔口, 有7日無限上網既卡賣, 都好似係幾十蚊…

咁捱左一日之後, 第二日放工就走去鴨記逛逛…

原來, 真係好多款選擇… 唔止7日, 14日, 28日卡都有喎…! 仲好平… 我揀左張$45蚊無限用7日既卡… 不過係純data, 無通話時間的… 我無所謂, 因為我慣左多部電話上大陸分享數據用, 買左淨data卡, 我最多帶多部電話出街咁姐…

sim_card_front

sim_card_back

張卡係無包裝既… (又係鬼卡?) 店主賣比我既時候… 問我識唔識開通(activate), 真係好鬼大陸化… 好采我都成日返大陸聽得明… 咁我梗係唔識啦, 第一次用… 咁佢就好好心咁大大隻字寫左個code在卡面比我, 叫我用既時候, 就用電話輸入呢個code按撥出, 咁就會開始計算7日無限數據啦!

Speed Test試用過… 在手機平均都有7Mbps速度, Tethering都有5Mbps… 都非常OK!

捱左剛好7日, 就到左我數據重生既日子… 自從見過鬼後, 我安裝左個新app, 黎監視住我手機流量… 原來… 一個月計30日… 6GB真係唔係太夠用架咋… 一日只係大約得200MB用… 其實睇幾條youtube, 睇下facebook朋友既相, whatapp/wechat send幾張賀年相… 就好快用爆1日既limit了…

data_monitor

以後都要乖乖地, 在公司, 屋企要多啲用wifi… 減少數據用量… 因為爆limit, 出街無得上網, 真係好唔方便的!

Google Authorship 終止了!

曾幾何時, 為左在google搜尋結果上顯示到自己頭像及文章簡介, 而花掉幾天時間找方法優化網頁內容… 結果, 花了近個多星期先領悟出奧秘, 成功在google search result見到自己google+既大頭照!

有左頭像後, 文章既吸引力明顯加強左!

當然, 自己都係google search用戶, 當結果返回, 事實上係會特別留意有頭像既網頁結果

唔知點解, 呢樣咁好既feature, 竟然終止了!

現在google search result已經唔再顯示頭像…

好彩, 之前曾經save低過自己blog既頭像result page, 而家就只可以懷念下了! (可惜只有手機版)

google authorship

GPS 應用開發雜談 (二)

GPS開發進入第二個月…

感謝同事們的努力, 基本的GPS Tracking終端, 與後台的數據接口已經完成並通過測試…

可惜同事中沒有人懂開發Web或Android的地圖應用… 沒辦法把數據庫中的座標呈現在地圖上…

小弟唯有親力操刀, 網上東找找, 西找找源碼例子, 把一個web應用寫了出來…

奇怪的事件發生了… 完成了web application後發現… google map api的roadmap及satellite圖層, 竟然有偏差…

就是說… 同一個座標latitude, longitude… 放在roadmap或satellite層, 竟然是不同的地點!!!

(請看以下實圖)

google_map_china_offset_1

當mapTypeId是google.maps.MapTypeId.SATELLITE時, 地圖上顯示的座標位置是對的 (請留意紅色框的地區)

google_map_china_offset_2

但當mapTypeId是google.maps.MapTypeId.ROADMAP時, 地圖上顯示的座標位置就離開了正確的地點 (請留意紅色框的地區, 已移到東南面約半公里… 實在令人抓狂!)

在網上找原因… 有人說這是強國的特別調整, 強國人有強國人的座標系統… 是與傳統的GPS數據有偏差… 所以地圖都需要特別偏移過去…

如有興趣研究這課題, 可以去google一下 “火星座標” … 完全唔係講笑… 在整個google map上, 就真是只有強國的SATELLITE興ROADMAP是拼不上的…

經過差不多兩日的刨文… 終於發現, 原來強國有一套獨立的google map api (中國版), SATELLITE層與ROADMAP層是能夠完美合併的…

國際版google map api:
http://maps.googleapis.com/maps/api/js

強國版google map api:
http://ditu.google.cn/maps/api/js

ditu… WTF… 多麼霸氣的英文名…

滿心歡喜的把原來的map api換上強國地址… 一跑之下… FUxK… 兩個圖層是能完美合上… 可惜… 是兩個圖層都是 >>> 強國座標版本 <<<

google_map_china_offset_3

果然係強國精神, 所有野一齊錯晒就係等如岩… $@#$#^%&%@

網上見到唔少技術討論文章, 研究如何換算正確GPS座標成為火星座標… 可惜工作較忙, 無太多時間去研究呢個課題…

希望盡快可以解決呢個全地球唯一國家既問題…

GPS 應用開發雜談 (一)

>> 序 <<

我… 從小到大都係一個喜愛創造應用軟件既IT人…

從以前課餘興趣, 直至成為職業軟件工程師… 到現在轉為項目管理… 始終對設計、開發應用軟件都懷著一片熱誠…

可惜工作繁忙, 餘下開發自己喜愛軟件的時間, 真是少之又少…

幸好, 年前加入了新公司, 負責的系統正好給予了一些新鮮感, 不減對工作的投入… 公司架構給予的自由度亦相對高…

在這公司工作快將一年, 日常工作亦漸上軌道(用了足足一年適應 T_T), 現在終於有機會規劃未來路向…

一直都想向gps應用發展… 難得公司系統亦有部份用得上, 下定決心這年多投放些資源開發GPS應用

(這樣利用公司資源, 算不上公器私用吧! :P)

開發團隊… 對gps技術的認識不深(可說是沒有), 表示無從入手, 哎… 我忽然感覺好像剛起步便準備打退堂鼓般…

(世上除了呼吸, 睡, 哪有一出生不用學習就懂的技能呢?!)

回想起少年時, 在工作上收到陌生/艱難的任命, 永遠勇於接受, 當年還沒有現在上網找技術參考的方便… 終日埋頭圖書館, 書店自掏腰包購入參考書… 埋頭鑽研技術…

或者, 現世代對工作的主動程度, 與價值觀已經不如從前了吧…?

gps_operation

說了堆前言… 也許應該投入正題…

說回gps開發… 認真的說, 我也是個門外漢… 對GPS的認識, 也只限於用過的手機gps tracking軟件(紀錄運動路線和速度), 和台灣單車環島旅行時用過的實時位置追踪器+網上發佈系統…

gps提供的資訊, 對我來說… 就是簡單到是三維位置(longitude, latitude, altitude), 再加移動數據(direction, speed)… 大概認識就僅是這樣…

而且, 我相信這些數據… 是非常容易通過api向相關的硬件獲取…

問題是, 你用什麼硬件, 要配合什麼api呢?

最平價門檻, 最直接的方法, 當然是用個人手機… 我相信, 現今任何一部手機, 都已經配備了先進的GPS硬件…

要學習寫gps應用… 我估計, 隨手拿起手機, 不用寫自己的程序, 只用第三方的應用軟件… 也能好好學習箇中技術…

在google搜尋上隨手翻了一翻… 找到了android sdk上有提供android.location的api…

http://developer.android.com/reference/android/location/Location.html

正好給我詳細地了解一個location(就是gps提供的一個點), 內裡應包含了什麼資訊…

原來, 除了我認為有的基本gps資訊:

– altitude
– bearing (direction)
– latitude
– longitude
– speed

還提供了:

– accuracy
– time
– 其他gps provider相關資訊

需要寫好gps應用, 首先是要了解gps能給予你的資訊有多少… 和你需要的資訊有多少, 再來做個好好的整合…

現有大既有了gps源數據… 下一部, 應該是怎樣獲取/儲存數據了…

下次繼續…

(註: 各有緣來到這篇文章的網友, 以上純屬學習分享, 結論和假設, 未必完全正確)

PayPal提款方法

不經不覺, 憑著一個小小的app, 在iphone及android平台服務了兩三年, 用上了google admob平台, 賺取了少少甜品費…

一直都沒有用paypal消費的習慣, 所以paypal戶口累積了些錢…

前天在amazon內想把paypal的錢花一下, 點知amazon和paypal是世仇, 竟然不支援用paypal結賬…

最後, 唯有用回信用咭結賬…

唯一有機會用paypal的機會又沒了! 到底我怎樣才能花paypal內的錢啊?!

在paypal平台內瀏覽了一下… 發現原來paypal有一個功能叫withdrawl, 能把paypal戶口內的錢直接轉賬至香港銀行的戶口內

立即試試…

 

paypal_withdrawl

 

怎知, 發覺要填寫幾項相當陌生的資料(紅色):

Bank Name
Bank Code
Branch Location
Branch Code

Account Number

一向填寫的銀行戶口號碼, 就是整串的戶口號碼, 甚少分開來填… 一時間有點不知所措… 特別是paypal的警告, 說填錯了引致轉賬失敗, 會收取20 hkd的手續費! 那可真是不能輕視的…!

上網翻了好久… 才能找到正確的填寫方法…

如大家剛好剛到相同的問題來到這篇blog… 那我便分享一下正確的填寫方法…

首先… Bank Name:

我建議用全名… HSBC, 就是THE HONGKONG AND SHANGHAI BANKING CORPORATION LTD恒生銀行, 就是HANG SENG BANK LTD

Bank Code:

HSBC是004
Hang Seng是024

Branch Code:

就是你的戶口首3個數字… 如戶口號碼是ABC-D-EFGHIJ, Branch Code就是ABC

Branch Location:

這個我也不掉以輕心… 因為Branch Location與Branch Code相關…

其實相關的資料可以到HONG KONG INTERBANK CLEARING LTD去查…

Clearing Code and Branch Code List
http://www.hkicl.com.hk/clientbrowse.do?folderID=271&lang=en

對上Branch Code後, Branch Location就直接寫Branch Name囉!

最後, Account Number:

就是戶口號碼去除Branch Code的所有數字了… 如上例, 戶口號碼就是DEFGHIJ!

成功轉賬後, 才發現paypal在usd to hkd匯率兌換中, 收取了約3%的服務費… 唉! 試驗性質的轉賬了約1000 hkd (因1000 hkd或以下會再另收手續費 T_T)

現在且看看轉賬多少天才能進入戶口…

 

 

 

— 後記

一共等左日

140 USD >> 1058.11 HKD, 滙率 = 7.558 (paypal)

140 USD >> 1083.6 HKD, 滙率 = 7.74 (hong kong bank)

被paypal食左約3%滙率… 下次都係搵野買算數… 好過轉賬… Orz…

paypal_bank_balance

 

Cut有線寬頻, 終止有線電視! 一肚氣!

首先, 本來我已經好平靜咁想同有線你好來好去, 心平氣和咁走上門市搵你攪終止服務手續…

點知你地偏偏玩埋啲那渣招, 左避右避, 扮晒門市唔攪終止服務手續, 諗住拖得一陣得一陣… 拖到我過左截數日, 又再強收我多一個月正價月費, 三百六! 真係簽長約慳埋雞碎都唔夠俾你屈一個月!

好心你地啦, 咁大間公司… 唔想人地cut台, 就做好啲服務… 服務好好地, 人地又點會重新拉過屋企啲線都要cut左你呀? 三日唔埋兩日就斷線, 無服務, 一等又三五七日先有返服務… sorry都無句, 投訴你又無件事!

完約半粒聲都唔出博我唔知, 就自動轉帳收全費… cheap得你…

心平氣和走上門攪終止服務手續, 又耍我叫我填form fax上台… 傻的嗎?! 咁大個門市, 上台你又識做, cut台你又唔識做既? 唔知乜道理…

提得出同你分手, 都唔係一時三刻衝動, 好心你就好黎好去… 留個好印像俾人! 臨尾仲要玩下啲舊客, 耍到你頭暈, 浪費人時間, 你覺得過癮咩?

俾你浪費時間係一件事, 但係過左截數日, 又要再強屈多我一個月服務費, 又點計先?

成功終止服務又要我再走多次落門市還機, 點解你唔一次過俾我做晒佢?!

cut_icable_form

 

 

我聽日就會email份form去有線, 仲會打電話confirm多次!

然後, 在呢度教大家如何成功cut有線寬頻同電話, 包括點先會打得通真人對話既所謂hotline, 等眾苦主可以早日同有線分手!

 

— 2014-03-24 10:39 終止服務電郵內容

收件者:eform@i-cable.com
標題: 終止有線寬頻服務‏

致有線客戶服務,

本人現申請終止有線寬頻服務, 並附上已填好的表格影像, 請儘速處理!

請以電話回覆確認服務終止日期, 並停止在本人戶口內自動轉賬月費!

凌先生

聯絡電話 9xxxxxxx

 

— 2014-03-24 10:30 自動回覆電郵內容

Auto-reply from eform@i-ca​ble.com (eform@i-cable.com)
標題: Re: 終止有線寬頻服務‏
親愛的客戶︰我們已收到閣下交回之表格,並已交由專人處理。如申請手續未能成功處理,我們會在四個工作天內聯絡閣下。切勿以此電郵處理其他查詢。如有其他查詢,請致電本公司客戶服務熱線183 2832 或於「聯絡我們」專頁 http://www.i-cable.com/cs/contactus.html 提供聯絡資料。多謝閣下使用有線寬頻 / 電視服務。

Dear valued subscriber,

We acknowledged that your e-mail form has been well received and we will revert to you within 4 working days in case of the form couldn’t be processed.

Please do not send your enquiry to this e-mail. Should you have any enquiries, please contact our Customer Service Hotline at 183 2832, or leave your contact information via “Contact us” corner at http://www.i-cable.com/cs/contactus.html.

Thank you for using i-CABLE/CABLE TV service.

 

 

— 2014-03-24 14:00 致電icable hotline查詢

為免icable出奸招又話收唔到email又剩, 我決定lunch後直接打上1832832熱線, confirm一下佢地有冇收到我既中止服務要求

詳情如下:

首先, 致電左1832832

然後, 聽一大堆說話, 後按”1″字選擇廣東話 (其實應該唔駛聽晒都可以直接按”1″字)

再之後, 又再聽一大堆說話, 後按”5″字搵客戶服務主任 (一樣, 唔駛聽晒都可以直接按”5″字)

第一關, 係問個人資料, 之後又問一輪點解要cut台, 消磨你5分鐘後, 第1關客戶服務員會再轉接你去第2關, 再疲勞轟炸

第二關, 係另一位服務員, 再向你offer優惠服務, 你唔要寬頻唔緊要, 你上埋其他台都唔緊要, 最緊要你留返住個有線電視! (咩道理?!)

最後, 堅拒留低有線既餘孽, 職員開始唔耐煩, 問我想點收張終止服務表格…

我就話, 表我一早收到, 一早填好, 一早email返俾你地, 我係想知我點樣確定你地收左, 同埋我要確定你地幾時先唔再自動轉帳扣錢

服務員回覆, 竟然係… 要24小時後先可以打上去問…

如果我唔主動打去問, 佢地會14個工作天先用郵寄方式回覆我能否成功取消…

神馬?! 去到如此階段, 佢地都可以拖住我?… 一個字… “服”

我都無你咁好氣… 我俾夠48小時你… 我兩日後再打俾你!

 

 

— 2014-03-27 15:00 icable cs

上左大陸, 竟然收到有線既電話, 打黎劈頭竟然係問我收唔收到停止服務信, 我話唔在香港, 唔知… 佢本來想收線, 雖然我俾住接長途電話費, 都要追問埋佢… 幾時先真正停止服務…

位哥哥仔真係唔太好耐性, 竟然話要我拎返啲接收器落舖先再問… 我!#EQ%%丫…

咁我轉問佢, 係咪要收到信先可以拎得落去丫?

位哥哥, 竟然話唔係… 我可以隨時拎落去… 封信, 只係話個門市地址俾我知咋喎… (大佬, 我在門市拎cut台form架喎, 駛你再教!!!?)

嘩! 大佬… 早響丫!!! 我一早拎埋部接收器去cut, 唔駛我又去多次丫…

好, 我星期六就去還機… 早日同有線bye bye!

 

— 2014-03-30 15:00 icable 門市

下晝執齊modem, 解碼器, 火牛及搖控去門市還機, 出奇地順利! 只係簽兩張form, 証明還晒所有器材就攪掂手續…

最後算好來好去, 終於正功同有線分手! V ^_^ bye!

貓星人睡帽

最鍾意就係週末, 無乜特別野做… 可以訓到自然醒…

今朝九點零, 太陽從窗簾間滲進房內… 感覺好溫暖… 當然, 另一原因, 係我主人仍然懶左在我枕頭上…

自從入冬以來, 我家貓星主人對我寸步不離; 由梳化, 電腦椅, 直至床上都鍾意黐住我… 凍既日子, 主人會訓入我被窩內, 好似今日無咁凍, 佢就鍾意訓枕頭…

想起近日在網上見到一張貓貓鍾意同主人一齊睡枕頭既漫畫, 簡直係我生活既寫照…

我就隨手拎起部電話, 同主人黎張selfie… 影返黎留念, 我自己都好鍾意張相!

人生得一黐身貓, 夫復何求? =^_^=

jaffe ling 蘿蔔糕