Jaffe的分享空間 Rotating Header Image

Xcode日記

Apple Developer Intruder

前幾日決定左將iphone既 “業餘進修” app下架…

個app都運行左一年半, 從statistic睇, 都幫過唔少人… 可惜使用量遠不如預期… 眼見app store已經冒出左其他類似app… 就借呢個藉口”退出江湖”了… 畢竟要維護一個app既內容要花唔少心機… 而家私人時間少左(接近零), 無奈要放棄維護部份app了!

講返正題, 好日都唔用apple developer console, 前兩日想上apple ios developer console將套app下架… 發現login disable左, 話乜野例行維護之類… 等下一日, 等下又一日… 去到今日, 蘋果終於承認被黑客攻擊, 所以要落大閘維修…

啲黑客真係勁, 我相信apple既it內防絕對超越企業級… 都可以被黑客攻擊到關門大吉… 真係唔野少…

雖然我只係過客, 坐在門外食花生排隊等開門… 但我都好想知apple要閉關到幾時, 先肯開返度門俾我入去將app下架囉…

apple_developer_intruder

E-Zone介紹「電視節目表」HKTV EPG

記得在上年推出iphone版電視節目表app後, 有幸得幾個網上3c網站報導, 令到每日下載率突發性暴升…

今年推出android版後, 大概都已半年… 暫未見同類鼓舞情境出現… 可能因為android早已有同類app, 多一個唔多, 少一個唔少掛?!

不過, 日前有位同事話我知… 原來在e-zone雜誌5月30日的內容, 有一篇小小的專欄推介過我呢隻android app…

hktv_epg_ezone

但我印像中, 呢段期間既app下載量並沒有特別提升… 所以完全無估到有地方報導過…

“銷情”冷淡原因, 應該同網上報導/實體書報導既效力有關…

經網上報導後, 用戶如有興趣, 可以直接click入app store下載, 十分方便!

但在印刷版內介紹, 令到下載app變得間接左(就算附上QR Code)… 我估好多讀者睇完就算, 或者轉頭就已經唔記得左去download… 間接流失左好多潛力用戶…

當然, 另一個朋友間既講法係… 香港電視質素下降, 越黎越少人睇電視, 愛煲劇者紛紛轉投網上媒體, 國外節目…

雖然我都唔係一個鍾意煲劇既人… 但我會留意啲特備節目, 呢類節目因為播放時間唔估定, 所以更需要一個手機app黎管理及提醒播放時間…

而呢樣野先真正係我寫app既目的… :P

在此, 再次多謝呢位非常熱心幫忙既同事, 仲將本e-zone俾左我, 我會好好珍藏的… xddd!

香港電視節目表 – 網頁版

當iphone及android版的香港電視節目表app已完成, 大概係時候完成最後部份… 就係網頁版…

其實, 做網頁版目的, 主要都係想吸引更多用戶使用iphone或android app… 所以網頁版會以最簡單形式推出…

只係可以睇當日節目, 同埋唔會有關鍵字搜尋, 更加唔會有節目提示功能 >_<

硬銷地附上app store同google play既download link, 希望用戶覺得岩用就一click即download黎用…

香港電視節目表 (網頁版) http://jaffeling.com/hktv

做個咁既website, 其實大概只係用左一個鐘左右… 希望google crawler幫下手, index左佢, 令到internet用戶搜尋”香港電視節目表”就可以搵到…

而家係16/4/2013 01:30, 唔知google幾時會crawl到我既呢個硬銷網頁呢?

即管計下時 ^_^ go!

(而家既頭位, 都係幾個其他歷史悠久, 或者係官方既節目表, 要爬越佢地, 就真係好靠SEO了… 努力!)
https://www.google.com.hk/webhp?oq=香港電視節目表

hktv epg web

小小苦楚等於激勵

自從轉左用android手機後, 一直沉醉於摸索新系統… 已經有一段長時間冇用ios…

直至上星期買左部ipad mini, 裝返啲舊apps後, 先發現原來我舊有的iphone apps”電視節目表”, 在ios 6之下操作有點點不正常… 就係日期選擇列亂晒籠, technical啲黎講, 係UISegmentedControl顯示次序調亂左… 本來由星期一至星期五順序排例的… 在ios 6之下… 就變左星期五至一咁排… 當按星期一, 就會顯示星期五既節目表, 亂晒籠…

呢個問題, 應該由iphone 5正式出街, 用戶紛紛由ios 5轉做ios 6之後出現…

app既評論頁面更加係慘不忍睹… 連續五、六個既1星級評分, 加上刻薄既劣評文字… 令我睇完之後不禁概嘆… 原來向用戶提供免費服務… 責任並不少於收費服務…

首先, 作為app developer, 我唔明點解ios 6會出現呢種問題… 因為backward compatibility係推出新系統必需留意既重要事項… 在舊app完全無改變之下, 根本唔應該容許發生呢種事… 咁對我地developer非常唔公平… 因為用戶唔會嘗試去理解背後誰是誰非, 只會望到眼前問題, 亦會無限上綱… 將你辛苦經營既心血化為烏有…

正所謂, 儲1000個用戶好難, 但損失1000個用戶, 可能只須5分鐘…

自從轉左新工後, 寫apps都生疏左… 就算iphone推出左retina 4長畫面, 我都懶得去更新app support… 反正有app黑bar非大不事情, 我始終覺得app既價值係實用性, 並非外觀…

發現問題後, 急忙download返最新既xcode及iphone sdk… 改正問題, 順道更新app來支援retina 4… 令我的app能用盡iphone 5的長畫面… 同一個畫面之下, 確實可以多看幾個節目描述… ^_^

現在事件已平息… 希望再推出既ios版本唔好再俾任何”驚喜”給developers…

最後, 正面啲黎睇… 有人鬧, 仲鬧得咁勁… 証明呢個app真係幫到佢地, 佢地亦都好依靠呢個app黎追電視節目…

可惜, 唔知係ios失勢, 定係問題出現後流失一定用戶量… 呢排使用量真係有明顯減幅… 當然包括我自己… 我自己都已經轉投android懷抱…

如果工作唔係咁忙, 我都好想將電視節目表移植到android上… 希望呢個心願早日達成…


(趁機把app換了支援retina 4長畫面)

星島親子王介紹「豐子愷漫畫精選」

fengzikai icon

因下載量太低, 一度連自己都遺忘了寫過這個iphone app…

今日朋友告知, 星島親子王雜誌在其中一篇專欄介紹了這軟件… 建議家長跟小朋友一同觀看分享… 才發現, 原來這app也有人欣賞的…

的確, 豐子愷先生的漫畫, 主題老少咸宜…

我在年多前被一幅作品 “冬日街頭” 吸引… 結果, 在網上一幅又一幅不停的尋找觀看…很短時間內便產生濃厚興趣, 並花了整個星期搜集及觀看了大量豐老師的漫畫作品…

豐老師的作品, 題材來自日常生活… 很多不為意的事物, 他都用來做題材… 觀看以後, 令人印像深刻…

豐老師對人生百態觀察入微, 他所描繪的社會現像, 如貧富縣殊, 親子關係, 就業通漲… 在數十年後的今天觀看, 仍能引起共鳴… 顯示社會問題從古至今, 亦沒有大變化改善…

再一次被蘋果app store拒絕上架!

前兩日, 再一次收到蘋果app store reject的訊息, 真令人氣結…

8.1 We found that your app does not comply with the Guidelines for Using Apple’s Trademarks and Copyrights , as required by the App Store Review Guidelines.

Specifically, your app includes Apple trademark name “Apple” in the app name in an inappropriate manner: 蘋果監視器

It would be appropriate to revise your app, app name, and /or marketing text to address these trademark issues.

話說第一次submit呢個app, 係主打監視apple store內既新產品開賣情況; 不過就正因為呢個理由… 被蘋果拒絕了… 原來條文內有禁止用程式extract任何apple.com既內容…

無計啦, 邊個咁得閒去刨晒所有terms & condition先去寫app丫… OK, 呢個無問題… 我覺得都合理…

今次被reject既原因, 又話我個app名用”蘋果xxx”… 侵犯到apple既商標喎… 真係激死…

當然啦, 個app本身係用黎監視蘋果website, 當然個名又係叫”蘋果監視器”… 第一次被reject後, 將佢重新包裝, 變成可以監視任何網頁既監視器, 諗住過到骨… 見個名都幾吸引, 當然想留用啦…

最後, 唯有將個app名由”蘋果監視器”變成”網頁監視器”… 唔會再被app store reject啦掛?!

又且看7日後既結果…

由最初好期待個app上架, 至到而家… 已經無乜所謂… 佢再reject, 咪又改下黎submit囉, 反正the new ipad監視潮已過… iphone5又有排都未開賣…

大把時間慢慢等, 慢慢tune好個app佢…

招職介紹「業餘進修」

自從「業餘進修」app上架後, 一直使用率及下載數量都低於預期…

我自己就覺得個app好實用, 就算平日自己都經常會用, 諗到有乜野想學想知, 都會用app搜尋一下, 睇下有關課程內容…

下載量低, 原因可能係冇乜人知有個咁既app, 或者宣傳渠道唔夠廣泛, 理論上… 要翻閱一本電話簿咁厚既進修指南書, 有個咁就手既app, 應該會轉用先岩… 另一個可能, 就係想進修既人以android用戶居多, 哈! 不過仲未識寫android app, 努力中!

但近呢兩日有少少奇怪, 「業餘進修」app下載量突然有明顯升幅… 直覺諗, 應該有某website介紹, 否則下載量唔會無啦啦有咁明顯升幅…

去google search下, 果然無錯, 係有報章報導左…

就係「招職」啦! 文章內容既評語都好正面, 努力得到人認同, 好開心…

網上版仲可以直接click link下載:

「招職」網上版

誤信饞言

每次submit一個新iphone app, 乾等apple做approval要七日; 之前唔知睇過邊個forum講, 其實有條捷徑: 就係你可以先upload個廢binary上去, 排住隊先… 再開始做development, 如果你趕得切在佢review前(7日內)upload個binary, 就唔駛浪費時間等…

我初頭都覺得呢個idea驚為天人… 不過, 經我証實… 純屬誤傳, 因為在月初, 我就試過呢個方法… 到而家仍在waiting for approval…

3月8日… 未寫program, 先upload定個垃圾binary同app description上itunes connect排隊等approve, 就在approve date前趕起個binary upload… 不過, 似乎apple真係睇你最後upload binary先再數7日先黎review你個app

最後一次upload binary, 係3月14號… 今日已經係3月20號… 所以, 已經等左6日, 我相信應該聽日或後日apple就會review我個app… 原來… 真係要乾等7日…

蘋果監視器

經過整個星期廢寢忘餐, 終於寫好這個蘋果監視器; 並上載到app store, 現正等候蘋果的批核…

從iphone 4s開始, 市面上冒起了不少開賣監視軟件… 用來監視著蘋果商店(apple store)產品的開賣程況…

不過所有軟件都是”被動式”的… 所謂”被動式”, 就是監視的核心程式不在軟件本身, 而是在另外的侍服器上作24小時監控, 待蘋果網頁有變動時, 侍服器會向這些軟件發出通知, 並由軟件再向使用者轉發警報…

“被動式”的好處就是: 使用者的只須下載並安裝軟件, 餘下的就只是默默等待開賣通知… 沒有任何監視的控制權… 而且, 這些軟件大多數是收費的, 從US$0.99至US4.99不等… 就算有免費版, 也會附帶最少15分鐘延遲警報時間…

在上個星期四(3月8日), 蘋果宣佈發售the new iPad(iPad3), 全城又再蜂湧到apple store上等待產品開賣… 在沉悶等待的同時, 我開始在pc上寫一個”主動式”的自動監視程式…

“主動式”, 就是它會根據使用者的設定, 定時去監視目標網頁, 當目標網頁上的內容乎合監視條件, 就會自動發出警報, 簡單來說, “主動式”的監視軟件, 就等如將”被動式”軟件的核心程式都搬了過來… 好處就是讓使用者完全掌握主控權, 通過自己的數據網絡進行監視, 毋須倚靠其他程式通知, 配合適當的設定, 也可以監視其他產品。

在忙於測試程式的時候, 突然偵測到iPad3開賣了… 於是連爬帶跌打開apple store網頁, 並買到了心愛的新iPad3…

突然, 寫這個新app的概念萌生了, 既然這套監視程式真的有效, 那可以將它移植到iOS上嗎? 讓其他擁有蘋果產品的使用者也可以一起監視開賣情況…

於是, 用了差不多整個星期的努力, 成功將這個監視軟件移植到iOS上面…

希望它可以早日在app store上架, 令大家也可以分享買到蘋果產品的喜悅!

工聯會業餘進修 iphone app上架了!

經過左metadata reject大意一役, 個工聯會業餘進修app終於成功上架… 有朋友問, 下? 你幫工聯會寫app呀? 當然, 佢係指收錢嗰種寫app… 當然唔係啦(係收錢就好了)… 我未出名到工聯會搵我寫app… 我之前都寫電視節目表app啦, 唔通又係四大電視台搵我幫佢地寫app咩? 哈…

個app暫時比預期中少人用, 可能promotion channel仲係唔多夠, 而家(撞)入黎既… 應該都係平日蒲開電腦forum既人, 因為… 暫時只係去左hkepc, discuss同uwants放左篇ad…

不過我相信人流係會慢慢加既… 都係人傳人嗰種啦… 好似電視節目表咁, 都經過左兩個星期既冰封; 開頭, 真係少人download到爆… 後來而家先叫突然抽升… 今日係hk app store既top #14位, 暫時停滯不前… 希望過埋呢個週末會升入top #10, 始終都係weekend會比較多人搵電視節目睇…

講返個業餘進修app, 我本人就覺得佢比電視節目表更實用, 因為… 每季收到嗰本工聯會出, 電話簿咁厚既業餘進修指南… 真係幾頭痛, 啲字密密麻麻… 雖然叫分左類, 但其實要從中搵到適合既course黎讀, 都真係要瞇一大輪, 同埋老啦… 啲字又細粒又密, 真係睇多陣都會老眼昏花…

以前公司做開search engine, 對分類同keyword search點都叫有啲輕驗, 寫呢類搜尋既app可以講係無乜難度, 難度反而在個data source, 固然工聯會唔會provide official既data source俾我用, 所以唯有自己寫個crawler去grab… 呢part都需要少少人工智能, 因為工聯會個website看似好structure, 其實都幾多變化下, 所以要詳細咁grab晒啲course information都要花少少時間… 我就花左大約整整兩日時間先fine tune到成功grab晒…

至於個iphone app, 由於有電視節目表既經驗, 不到兩日就寫起左… 當然, 兩日起既係first draft, 夠submit去app store排隊上架… 就係偷埋呢7日排隊時間, 中間再fine tune下啲logic… 趕得切在佢review前resubmit埋個binary…

不過, 最希望就係仲有時間(同心情)寫多個ipad版, 始終… 都係覺得iphone版啲字又細, screen又細… 睇得都係辛苦… 搬埋過去ipad版就perfect好多… 起碼一版可以睇晒成個course detail, 或者… 地圖都可以再睇detail啲啦!

不過暫時未有太大動力… 因為使用量仲係偏低… 開始寫ipad app, 都真係要等待下東風既來臨… 包括使用量, 同個人心情等… 始終係嗜好, 唔可以將嗜好轉化為壓力… 否則就失去左樂趣…

或者… 下一步會嘗試下寫android app, 不過… 起步就肯定難過ipad app, 因為始終係新platform..