Jaffe's BLOG
今日打算在itunes connect修改”電視節目表”app內容其中一啲字眼, 點知… save嗰陣發現apple改左policy, 強制提供既screen capture一定要係high resolution, for retina display咁話喎…
原意係好既, 等retina display既用戶可以睇幅靚啲既sample, 但… 問題就出在… 我只係update下啲字眼姐, screen capture根本無改過… 之前upload既resolution都係320×480, 霎時間要我去邊度搵啲640×960既圖去upload呢又!?
好彩, 機係死既, 人係生既…
即刻用photoshop將原來係大小320×480夾硬扯大到指定既大小640×960, 睇落都真係有少少樣衰, 不過iphone 4個screen睇又會縮返細, 人眼應該睇唔到好大分別既…
submit交貨… 攪掂!
等下次真係有screen change先screen capture過晒所有圖了!
玩電腦定被電腦玩? 有時啲野, 簡單如format一個harddisk partition原來都好頭痛!
個western digital green harddisk之前用落nas個raid1, 後來因為green唔夾raid1, 被迫退返出黎做返個普通hdd…
本來都無乜野值得寫blog, 但個hdd之前曾被format成ext3, 放返落windows(用external docking), 想重新format成ntfs, 原來都係一大學問…
重覆試過好多次delete partition再format, 佢都係format唔成功, 自動變返ext3…
真係灰, 原來做左十幾年it人, 我連format個harddisk都唔識!
唯有繼續上網搵下料, 點先可以救返隻harddisk呢? 唔通一日ext3, 就一世ext3? 唔會掛?
後記: 原來遠古以前在windows 7裝左ext2fsd, 就係佢阻住我format ext3 harddisk, disable佢係唔得, 一定要uninstall左佢… 終於可以正常format ntfs了!
backup既原意應該係令到系統安全, 不過近期用左aronis true image backup左一次, 先發現有得必有失…
backup完本來都冇乜野, 不過之後restart就開始多煩事…
首先… restart就stuck左係以下畫面, 唔多… 幾粒鐘咁上下… 唔敢熄, 本來唔知乜事, 上google查下, 原來好多aronis true image用戶都會遇到呢個問題…
(operations are in progress, please wait. the machine will be turned off automatically after the operations are complete)
網上既討論話… 原來係有啲aronis service未完全shut down, 例如mount左tib image, 或者佢未backup完都會有以上情況, 其實遇到呢個畫面, 基本上都唔駛等, 直接reset或拔電就算… 因為我就等幾個鐘, 有人等十幾個鐘… 最後都係要reset先可以用返windows!
強制restart windows既問題多鑼鑼, 一入windows就當然會話我上次不正常關機, 又要recover又剩, 卒之都reboot多兩三次先可以正常入返windows…
唔信邪, 想再試多次用aronis mount個800gb tib file, mount完再restart… 睇下windows會唔會又stuck係operations are in progress畫面…
(mount左十幾分鐘, 我打完篇呢blog都仲未mount完, 測試完之後再同大家分享下)
所謂不聽老人言, 吃虧在眼前…
在買nas之前已經聽過人講, 行raid千其唔好配green harddisk, 但從來無人解釋過點解…
事實green價錢平一大截, 用落nas做raid1或raid5真係慳好多$! 家庭用, 又唔係商業用… 真係唔捨得用貴50%既價錢買non-green… 睇forum又有人拍晒心口話自己都係用green行raid1, 絕對無問題云云…
自問都好有冒險精神, 就買左兩隻western digital green 2tb (WD20EARX-00PASB0) 黎行raid1…
惡夢既開始… 原來green harddisk真係唔適合行raid1 (raid0或jboh可能都ok)… 由最初用似無乜問題, 直至近期使用量同流量大增… 終發現green真係有問題…!
每當transfer大量data時, 隻buffalo nas就會report出現read/write error, 跟住好快就drop out是但一隻hdd, 著埋警告燈(i12)The RAID array is being degraded mode.
開頭唔知乜事, 仲以為其中一隻hdd出事, 點知, rebuild raid之後又輪到另一隻drop out… 先明白原來green真係唔做得raid1 (raid5應該都唔得)…
高人指教後, 原來關乎一樣野, 叫tler (time-limited error recovery), western digital green出廠就disable左呢樣野, 令到佢唔可以用落raid… 就等如平賣樣野俾你, 但先閹左佢某功能… 等advance啲既用途要買較貴既model (如blue, black之類)
最後, 屈服… 要換hdd了, 但人就係咁… 就算換, 都先試只換一隻…
泰國水災, hdd價格高漲既時候, 買hdd真係要忍住痛… 選擇了Hitachi的HDS723020BLA642, 成千二蚊, 比正價炒貴左五成; forum睇有人用佢黎行raid1, 似乎無乜問題… 但好似我咁搭配wd green一齊行raid1就唔知得唔得了…
rebuild個raid1最後用左我成個星期… 真係估唔到要咁耐… 2tb既raid1裡面有大約有1.2tb data, 用足7日先rebuild 晒(i18閃燈一長八短, 閃足一星期!)…
計下數, rebuild speed即係:
1.2tb (1000mb x 1200) / 7d / 24h / 60m / 60s = 1.98mb/s (嘩, 好似上網download野咁慢!)
—
剛rebuild完, 要再試下呢個組合得唔得! 希望唔會drop out隻僅餘既green啦, 否則就要換埋另一隻hdd了!
後記(2月13日): 經過十天的反覆測試, 似乎使用western digital green 2tb (WD20EARX-00PASB0) + hitachi 2tb (HDS723020BLA642) 沒有再出現drop out情況, 而且backup及restore過程順利, backup穩定了, 終於可以安樂過日子
第二個iphone app終於完成了! 上載到了app store, 現正評核中… 如無意外, 大概下星期左右就可以正式上架了…
由心的喜悅, 因為完成這個新app真的不簡單… 由找data source至真實地把節目表呈現在用戶眼前, 當中要經過10數個步驟… 並不簡單…
事實上, 在2011年暑假已經有這個構思, 但一直都被不同的事件防礙著, 進度逐少逐少積累著… 終於在較清閒的農曆新年完成了!
data source — [c# .net] –> mssql database — [ftp] –> mysql database — [php] –> xml — [xcode] –> sqlite — [xcode] –> iphone app
對編寫這類程式, 我絕不陌生… 因前公司就是主要做搜尋引擎(search engine)的業務, 累積的經驗很管用… 從如何規劃database內的數據、安排索引鍵(index)、以至如何有效地使用select statement將正確數據取出… 到現時, 我仍覺得非常富挑戰性及有趣味…
關鍵字搜尋亦是易學難精的技巧… 不過在電視節目表就沒大發揮空間, 每星期也不過數萬個節目罷了, 數據量不多, 要搜尋的節目名稱變化也不大… 留待以後的app再作多點關鍵字搜尋的技術研究…
另外, 值得一提就係個app icon, 本來好想用小學年代”少年警訊”既logo作藍本(印像中係藍色, 有個電視機同JPC/少年警訊字樣), 但google左好耐, 都搵唔到…
最後唯有保留電視機, 再蓋特區旗… 背後加個大黃色! 紅加黃既組合, 極度懷舊! 好鍾意…
希望個app能早日同大家見面, 試試真實既traffic loading…
本來, 寫食評應該去openrice既, 點解我要在自已blog寫食評呢?
好簡單, 因為我在openrice篇食評遲遲都唔批核… 就快半個月啦(咩原因? 我見openrice頭版有大飽口福廣告, 我估篇食評內容同佢有抵觸掛?)
咁唯有post落自己blog… 打算去幫襯既網友, 有緣黎到呢篇blog, 可以參考下…
— 下為原文
在openrice睇到呢間新開既自助餐廳, 主打海鮮, 都有幾個好既食評; 新年前, 女友生日就不如試下呢間… 又話有多款龍蝦海鮮任食, 聽到口水流… 早成個星期就book定位, 但… book位嗰陣已經有少少不愉快…
點解食都未食就咁不愉快? 無他既… 訂位時候, 位操鄉音既阿姐… 似乎好唔耐煩喎…
我: “唔該, 我想訂1月21號晚自助餐兩位”
佢: “你食邊場先得格” (好唔耐煩咁)
我: “下? 有咩場揀呀” (鬼知你有邊場咩! )
佢: “哎也! 有好多場家嘛! 午餐, 下午茶, 晚市同宵夜架!” (我欠左佢咁)
…
經過一輪來回問答後, 終於book好左六點… (後來再上openrice睇多次, 哦… 原來係國內集團, 唔怪得服務都比較重內地口味 )
—
到左1月21日, 差唔多五點半已經到左銅鑼灣, 見早左咁多, 之前位阿姐話晚市係5點至9點… 咁不如早啲入去啦! 去到後, 已經見到有條大隊… 嘩! 唔係掛! 望一望個場入面, 咦, 無乜人咋喎 (應該係好多位先真, 個場真係好大)
心諗, 唔通條隊係walk in 好彩自己有訂位… 點知, 登記完先發現, 條隊就係book左六點班客… 下! 咁無彈性架 人地早黎左, 入面又有位… 好心俾人入去先啦唔該!
(訂左位都要排大隊!)
等左廿分鐘, 終於入得去, 裡面真係好大… 我地被安排坐到最入咁滯… 都好既, 遠遠地都有窗景, 算有街望下… (之後就知奶野, 每次出去拎野食, 真係好似百萬行咁! 腳都軟! )
間廳餐既格局, 真係堅似酒樓… 或food court, 枱凳坐得唔多舒服, 心諗… 每位$398仲要加一架… 賣相已經唔值, 希望啲野食抵返條數啦…
—
首要目標一: 睇完網友既食評, 當然要主攻龍蝦, 條隊都唔短, 大大話話都有十幾人排緊, 但… 唔郁喎… 阿姐安慰排隊既食客, 煮緊架啦~ 要等下…
原來, 海鮮攤檔長期一堆人排隊既原因係, 出野都唔算快… 好多時龍蝦同鮑魚都要排十幾分鐘先有得食, 所以長期都排住一條龍…
另一個問題(我覺得好嚴重), 就係… 每人只限拿一份… 咩叫人份呢 就係… 龍蝦半隻或鮑魚一粒… 就叫一份…
原意係唔想啲人一次拎得太多, 攪到人地無得拎… 但… 你地有冇考慮過我呢啲人呢 兩個人黎, 一個人要坐係度看管財物, 一個去拎野… 排一次要十分鐘… 兩個人點一齊食野呢可
好心啦… 唔好多, 一個人最多拿兩份好唔好, 照顧下我呢類人, 唔好要人地一個食一個排好唔好?
—
好, 講返啲野食先…
排場夠晒勁, 放左勁多海鮮出黎, 有龍蝦, 鮑魚, 海蝦, 善貝, 魚之類, 但竟然仲有唔少其他無人會食既野都放埋出黎, 丸呀, 菜呀, 魚蛋, 魚片之類… 家陣打邊爐咩…
不過, 原來放出黎既海鮮只係”裝飾”黎, 你地食既, 都由廚房拿出黎… 都係既, 個場可以坐幾百人, 得枱面嗰啲, 點會夠分呢又…
(主攻 – 龍蝦)
餐廳引以自豪既主打項目 – 龍蝦! 廣告話有五種食法, 我搵黎搵去, 都只係數到四種咋喎 (白灼, 蒜蓉, 芝士焗, 鐵板燒… 另外, 真係搵唔到第五款)
(蠔, 鮑魚)
另一個餐廳最多人食既, 應該係蠔同鮑魚… 鮑魚唔錯, 但想食佢, 要排條隊真係恐怖… 唔好彩剛派完, 等一轉隨時要15-20分鐘, 每次出我諗大約有30-40隻, 但真係一人一隻都好快派晒… 要食都一定要等…
蠔就有兩款, 芝士焗同燒蠔, 燒蠔比較好食… 焗蠔就真係不敢恭維, 可能全部唔靚既蠔都拎晒去焗… 點解 因為粒肉”細”囉… 搵多啲汁遮住佢… 咁咪唔覺得難睇囉… 食嗰陣, 真係感覺唔到粒蠔仔在那裡啊 燒蠔就好OK下… 可能燒… 無得遮遮掩掩, 點都要搵返啲大粒啲既蠔出黎俾人食… 即場燒, 熱辣辣, 推介…
(鵝肝, 蒸蝦, 炒規)
另外, 值得食既係蒸蝦, 幾好食… 但多數人都顧住食龍蝦, 忽略左呢味…
鵝肝都幾好, 不過… 真係小家左啲, 每人每次只可以拎一少塊 ( 細過五蚊銀) 我呢啲兩個人去, 又坐得遠, 來回排兩次先可以一齊嘆下塊鵝肝…
仲有個炒規, 簡直係無人問津… 但係炒得好香, 幾好食! 不過, 竟然炒到有三份一都未開的…
(例湯, 雞絲翅)
仲有佢既所謂”滋補燉湯”, 老實講我唔知佢有幾補, 但味道… 同茶記既例湯一樣 推介既反而係佢個雞絲翅, 好快派晒, 下次唔該等半個鐘… 頭兩次派貨我都miss左, 後來索性不斷來回”監視”個廚師幾時出翅, 終於食到… 唔知係唔係恨得耐, 覺得特別好食…
—
前前後後, 又要排隊, 又次次山長水遠出去拎野食… 食飽都原來八點! 嘩… 連續無停食足兩個鐘咁滯… 唔算捧住個肚走(可能真係運動量太大!)
埋單好慢, 差唔多埋左20分鐘… 鬼咩, 一個職員負責埋單only… 個場幾百人呀! 個個都係咁上下時間走…
(走佬咭)
最後, 要提一提一件趣事… 就係埋單後, 服務員付上了一封利是(裡面竟然係, 情人節coupon, 復活節coupon, 母親節coupon, 父親節coupon, 最頂佢唔順係Ladies Night Coupon!!!!!!! 笑到牙都軟) 唔知邊個marketing諗既呢, 真係要升佢職!
另外仲有兩張咭… 初頭諗, 咦 唔通咁快就醒兩張vip咭俾我 (我都幾受呢啲咁既虛榮)
不過, 服務員話喎… 原來呢兩張係”惠顧咭”, 出門口要交俾門口位職員, 証明你已經俾左錢, 咁先走得… 否則… 可能唔俾你走 (有啲人想落街買雜誌或食煙咁點算呢可!)
—
唔… 呢間自助餐… 講野食款式, 真係唔多, 幾齋下… 如果你唔係好鍾意食龍蝦, 未必會鍾意呢度, 因為主要食物都只係龍蝦, 其他… 乜鬼燒味/點心/粉麵之類, 你唔會俾四百幾蚊黎食囉! 重複多次, 要我俾四百幾蚊食多次, 真係唔會啦, 今晚後, 短期內我都對龍蝦產生恐懼…
另外, 你都要體能幾好先可以頂得到兩粒鐘… 因為去拎食物同排長龍都會花費你唔少氣力, 或者帶個體貼既男友去都OK既…
—
最後評語係: 食自助餐, 唔應該咁辛苦的, 食呢兩粒鐘, 真係好唔enjoy; 唔係話啲野食唔好味, 而係好食既款式太少, 所以啲客都聚晒去同一個地點, 造成經常擠塞… 同等… 等… 等… 等…
— 以下係我在openrice對大飽口福既評分
推介美食： 白灼龍蝦, 蒜蓉龍蝦, 蒜蓉鮑魚, 燒蠔
堂食等位時間：20 分鐘
用餐日期：2012-01-21
慶祝紀念：生日
是次消費：每人約HKD420 (晚餐)
用餐優惠：信用卡優惠
評分： 味道4 環境2 服務3 衛生2 抵食2
— 後記
睇完大飽口福在openrice既廣告後, 我要補充多句: 說好的生蠔呢? 說好的凍蟹呢? 完全未見過… o /o
(諗真啲, 大飽口福自助餐獨沽一味食龍蝦, 要每人四百幾蚊, 都真係好貴下!!!)