那些年, 我們用過的貓砂…

貓砂邊隻好? 我養左貓四年… 實在都係講唔出, 各有長短高低…

每隔一段時間, 就會想試下新貓砂, 睇下會唔會更好…

而家, 等我回憶下我用過既貓砂, 其實唔止以下咁少, 不過呢啲都係比較有印像…

(cat’s best – 木砂)

第一隻用既係cat’s best, 係木砂黎… 新手養貓乜都唔識, 就聽賣家講用呢隻… 用落唔錯, 唔會臭, 但缺點就係 “貴” 同埋 “大塵”… 因為係木砂, 同埋好細粒, 所以佢好似啲泥沙咁… 好易散, 同埋好多塵會被貓帶出砂盤, 或者撥砂既時候會撥到出晒黎地下, 掂到地下啲水就結成一pat pat, 幾核突下… 同埋唔可以沖入廁所, 鏟砂都幾煩下 (但當時未知道有啲砂可以沖落廁所, 所以尚算OK)

(松木砂)

輾轉之下, 竉物店介紹左呢隻松木貓砂俾我試, 話大粒啲, 無咁易撥到周地都係… 同埋會香啲, 咁又買包黎試下… 點知…! 被騙了! 因為呢款砂遇水即變粉… 唔會好似cat’s best咁結成一舊, 所以根本唔適合我用 W%YH%HD!^!!! (後來先知原來呢款沙只適合用落雙層砂盤, 啲砂遇水變粉, 會跌落下一層, 就唔會阻住貓貓)

(森之香 – 木砂)

上網睇, 原來”森之香”都唔少fans… 原因, 我估係平… 因為真係好平, 一袋8L都只係六十幾蚊, 比我用開既平一大截, 咁… 我就走去試下…

買嗰刻, 其實都心知不妙, 拿上手… 真係輕過羽毛, 用落就知… 真係平得有道理, 啲沙好似紙咁輕… 莫講話撥, 就算貓貓由砂盤走出黎, 都會帶唔出砂出黎, 因為啲砂太輕, 好容易就會黐在貓貓腳上, 特別係我養既係長毛貓, 啲砂會黐在手腳上, 再帶出砂盤…

(水晶砂)

聽朋友話佢用水晶砂, 好似又好地地… 又走去試下, 點知… 水晶砂凝結力都係麻麻, 吸水力又差, 貓貓尿尿完攪到個盤污糟晒! 結唔實, 撥完啲新舊砂撈到亂晒! 用完一次就算數!

 
(cat litter – 紙砂)

之後, 想試下比較乾淨既貓砂, 竉物店遇到呢隻cat litter紙砂, 百幾蚊好大包, 諗住試下! 點知… 因少失大… 其中一隻貓貓唔肯用, 忍左兩日尿, 最後谷到疴血, 染到啲砂變左紅色我先留意到… 最後帶左去睇醫生, 白白駛多左三百幾蚊! 最後唯有變返原本用開果隻cat’s best頂住先…

(sanmate – 豆腐砂)

上網睇forum, 有人介紹過呢隻sanmate既豆腐砂, 可以沖落廁所, 又話吸臭好, 所以買黎試下… 真係幾貴, 成百蚊一包, 得7L, 三隻貓好快就用晒, 之後上網訂, 一次買6包可以平至平均八十幾左右…

呢款砂用得最長時間, 連續用左大約年半! 不過缺點係啲砂好易散, 被貓貓踩多兩下, 撥多幾撥就變晒粉, 周圍飛… 同埋並非如包裝所講唔易 “飛散”, 吸臭力亦都唔強…

不過自從日本地震, 就經常缺貨, 又大加價… 所以最後迫住嘗試其他砂…

(sanmate – 紙砂)

逛竉物店, 見到呢款紙砂, 都是sanmate出品, 凝結會變色, 好似幾好… 所以就買黎試過, 事實上凝固變色呢樣野係幾好, 可以知道邊啲砂污糟左, 方便清理… 不過, 問題就係… 凝固得唔夠實在… 所以被貓貓多撥兩下就散晒… 新舊砂混合埋晒一齊, 幾難清潔下… 要將變左色既砂一次過清理, 都唔係咁容易…

(bluno – 紙砂)

後來, 經同事介紹, 佢用緊呢隻blueno既貓砂, 話唔錯… 重點係比sanmate既紙砂平, 而家效果都幾好… 咁就試下, 真係唔錯… 不過缺點就係吸臭力麻麻… 同埋… 我相信係一般紙砂既通病, 就係凝結得唔好, 變左色既砂, 好容易同新砂混合埋一齊, 日子耐左, 成個砂盤就會變成藍白藍白既混合砂… 難以處理… 要一次過換晒成個砂盤啲舊砂… 都幾貴!

特別要一提, 原來blueno在市面有好多”假貨”, 唔知係唔係代理商既謊言… 零售店話係來自日本既水貨, 代理就堅稱係假貨囉…

我最初第一次買, 係7L的… 但後來上網睇, 原來行貨係無出7L的, 只有6.8L及8L… 後來我就小心啲, 睇到係6.8L或8L先買… 不過, 水貨平好多, 一袋7L平均只需要八十左右, 但行貨6.8L一袋平均都要九十幾… 但香港代理話水貨會嚴重影響貓貓健康, 所以… 我唔敢博了… 都係每袋貴十零蚊姐, 睇一次醫生都幾百蚊啦!

—

後記: 打完篇文先發覺, 原來呢幾年真係試左好多款貓砂, 不過其實到而家, 都仲未遇到一款真係滿意既… 貓砂都真係幾貴, 閒閒地一個月都用兩三包… 開支隨時比貓糧更高!