Jaffe的分享空間 Rotating Header Image

天網灰灰

有時世界就係咁… 做錯事唔一定要承擔應有既責任…

就好似住我隔離屋個阿伯一樣, 我唔知前世有乜對佢唔住, 自從佢搬左去我隔離屋後, 經常自己裝修屋企, 唔係裝修一兩個月嗰種, 我印像中佢由前年尾搬黎後… 斷斷續續不斷裝修足咁多年!

我明, 看更話佢以前做工程師喎… 咪即係裝修啦可? 我留意到佢, 天台由無頂變有頂… 再有有頂又變第款頂… 砰砰啪啪, 攪到隔離左右家無寧日, 有時夜到十點幾都忍唔住要揼下野先安樂…

我真係唔明, 你都九十幾歲人, 仲咁好精力… 安享晚年靜靜地種下花咪好囉, 就算種花你都要自己鋸個花甫, 揼個鐵架出黎, 唔封你做重金屬狂人都唔得!

日鑽夜鑽, 你屋企咪同我屋企一樣豆腐潤咁細, 你都可以攪足幾年… 鑽完又鑽, 鋸完又鋸, 揼完又揼…

我就話日頭出左去返工聽唔到, 難為我屋企三隻貓, 真係無好日子過… 好啦? 你個阿伯黎左之後, 我一共死左兩隻貓, 都唔知係唔係俾你啲噪音煩死, 定俾你裝修啲有毒氣體攻過黎毒死…

我都唔係睇一次見你爬出露台裝修, 有時啲鐵梯就咁就放出露台之外, 真牙煙… 唔小心一kick, 或者風一吹, 隨時成把梯飛落街, 呢度係深水埗, 條街車多人多, 你唔顧自己都顧下人… 我屋企人都成日會經過樓下, 你唔好害死我地!

上得山多終遇虎, 2月4日, 一早又俾你啲電鑽電鋸聲嘈醒, 走出去露台望下, 你又係度鋸花槽… 真係煩死! 午飯後, 拿拿林沖涼出街… 點知沖沖下涼, 有警察拍門… 話我知有人跌左角鐵落街…

唔駛審, 一定係個阿伯啦… 警察話要借我個露台望下街同周圍環境… 兩個警察由我露台望過隔離屋, 似乎望唔到啲乜野, 因為個阿伯醒呀, 裝修包到自己個單位密一密, 真係完全睇唔到佢成地都係風車鋸, 電鑽, 所有重型武器都無辦法由我露台”裝”到過去…

瀨左野, 個阿伯就梗係閃走左啦, 唔通仲繼續鑽野咩! 啲警察又按鐘, 又拍門都冇人應, 我以為佢咁快手著左草添… (後來先知原來佢一直喱埋係屋入面)

我都懶得理咁多野, 留左身份證電話俾警察就算… 有咩事咪call我囉, 做良好市民, 我肯架…

換衫落街, 見到個私家車司機就無辜囉… 無啦啦架車俾人揼穿左… 同啲警察企在樓下無奈mode, 又做唔到啲乜… 人又捉唔到, 真係唔知點算好… 算啦! 鬼叫你泊正係阿伯樓下咩… 算你唔好彩…

之後幾日, 我以為啲警察一定會返上黎輯拿兇徒歸案啦, 點知… 一日又一日… 啲警察都冇上過黎… 個阿伯好連戲呀… 連續兩三個星期都繼續喱埋, 一粒聲都無出過, 當自己真係唔係度…

終於, 過左一個月… 今個星期開始佢手又痕呀… 又開始狂鋸狂鑽… 煩死!

香港就係咁, 你唔住啲有管理公司既樓, 特別係我呢啲舊樓, 就要承受隔離左右有啲變態既住客, 每日都做啲煩住你既事, 等你無日安寧…

以為佢跌野落街會受下應有既教訓, 點知… 無架! 原來做錯事, 喱埋幾日就得… 冇人會再追究… 有緣睇到呢篇blog既人, 下次跌野落街, 記得喱埋, 唔好開門, 扮無人… 咁過幾日就無事架啦! 邊個話天網灰灰? 我話, 俾人跌野落街整穿架車既車主就真係”灰”…

今次好彩就無整死人! 都算無人俾你害死…

(即日幾份報紙都有報導, 角鐵高處墮下, 擊毁私家車)

(大廈法團就只係出下呢類通知, 叫你醒定啲)

Leave a Reply

Your email address will not be published. Required fields are marked *

%d bloggers like this: