Jaffe的分享空間 Rotating Header Image

唔送膠袋, 更不環保

七月七日之後, 各大超市連鎖商舖開始唔送膠袋…
 
每星期最少光顧兩三次超市既我… 感覺到極不方便, 唔係因為每次都要額外花$1.5去買三個膠袋, 而係要先聽收銀員一大輪忠告既說話, 又向我解釋政策及推鎖環保袋云云…
 
呢幾日, 排隊收銀條龍, 見到好多師奶阿叔, 都係就咁拎住一兩件貨品就算, 亦好鬼響應政府呼籲, 俾完錢唔要膠袋, 就咁拎走… 以前見到既龍, 一般都係一大車貨品, 要等好耐, 而家, 都唔駛點等就攪掂…
 
而我, 次次去親超市都大量入貨, 冇返三四個膠袋根本裝唔晒, 而每次去超市都係即慶, 都好難話隨身都帶住個所謂環保袋去…
 
我拎膠袋, 自己都冇乜所謂"唔環保"既罪惡感, 因為我每個超市膠袋, 都會用黎裝垃圾… 我相信, 屋企用超市膠袋裝垃圾係好常見既事, 除非你住大型屋苑, 管理費已經屈左你每月一包垃圾"膠袋"
 
即係話, 無論你係乜野人, 你屋企裝垃圾, 都會用膠袋… 唔通咁又算"唔環保"?
 
如果我盲目地環保, 去買野自己帶購物袋, 唔方便之餘, 我亦要要開始去"買"垃圾膠袋裝垃圾, 而膠袋使用量亦根本無減少
 
同樣, 好多人因為超市唔送膠袋, 而唔去買野, 或者購買量大減, 超市一樣會賺少左錢, 到時又會加價, 或者會諗古怪招去避過法律…
 
例如將每樣貨物變成優惠裝, 預先用膠袋打包, 有手挽, 而家已經好多呢類貨品, 好似食油, 洗頭水, 公仔麵之類, 咁就可以方便客人唔駛用膠袋, 但係… 當買同樣數量既貨品, 就會變得用得更多膠袋, 而呢d包裝又唔可以循環再用, 咁樣就等如連基本減少膠袋既目的達唔到囉!
 
今次政府好成功令香港實施膠袋徵費, 叫就叫向環保交左功課, 但係, 只係為交功課而做…
 
最後, 結果只會令人少左用超市膠袋, 但我絕對相信, "不環保"膠袋使用量反而會大增…

4 Comments

  1. Chan says:

    無錯,我都係用超市袋做垃圾袋.見過一份文章, 講香港政府引用某歐洲國家為例,實行膠袋徵費後膠袋用量減少左七至八成.但佢地無睇返垃圾袋既銷售量係上升左十倍…..

  2. dynamitesing says:

    政府一貫作風, 真係見怪一怪….個個都話其實膠袋要左番黎都重用先真係掉!我屋企都係咁…同埋男人老狗拎住個超kawaii 環保袋…都寧願手拎or 要膠袋啦

  3. William says:

    根本就係擾民政策,我都好SURE超市同便利店做少好多生意。 因為我有幾次想買多D野時,因為知道冇袋用,所以都係買少D算。 仲有,而家冇膠袋,我不單之冇佢做垃圾袋,仲連幫屋企隻貓執屎的袋都冇埋,頂!

  4. Chan says:

    依家去超市都唔再買咁多垃雜野零食之類,次次都係一個膠袋裝得哂走人,咁係咪最終受害既都係零售商呢?

Leave a Reply to William Cancel reply

Your email address will not be published. Required fields are marked *

%d bloggers like this: